Ïohpdiang ka jylla haduh 8.39 klur na ka sorkar pdeng

Shillong : Ka madan JN Complex, Shillong ka la shah jied ban rung ha ka thup jong ka Khelo India State Centre of Execellence ha kaba kan ioh pdiang ia ka song kyrshan pisa kaba haduh 8.39 klur tyngka na ka bynta san snem.

Haba pynbna ia kane lyngba ka twitter, u Myntri Rangbah ka Jylla, Conrad K Sangma u la ong ba kane ka Centre kaba ki ioh kan ia ryngkat kyrdan bad ki jaka ialehkai jong ka pyrthei kiba lah ban pyntbit bad sei ia ki nongialehkai kiba kynsai ha ka Ri.

Halor kane u ai ruh ka jingiaroh ai ka sorkar pdeng lyngba u Myntri ka tnad Ialehkai jong ka Ri, u Kiren Rijiju uba la jied ia ka Meghalaya ban don lang kum kawei na ki 6 tylli ki Khelo India Centre ha ka Ri.

Kitei ki 6 tylli ki jaka ialehkai ba shah jied ki kynthup ia ka Sarusajai Guwahati, SSS Complex Balewadi Pune, JNS Complex Shillong, Paljor Stadium, Gangtok, New Sports Complex, Silvassa bad ka Madhya Pradesh State Academy.