Jur ka jingkynad hapdeng ki nongïalam ka NPP, iehnohkam ki nongkitkam ka Ranikor Block

U Danggo ruh udei ban mih noh na ka NPP’

SHILLONG, K’lyngkot 24: Ka seng National People’s Party kaba ïalam ïa ka sorkar MDA katba dang wan ki sngi ka la nang duh bor bad duh ïa ki nongïalam na ka daw jong ka jingdon ka jingïapher jingmut hapdeng ki nongïalam.

Kane ka jingïapher jingmut jong ki nongïalam kadei hapoh ka distrik South West Khasi Hills bad na ka daw jong ka jingkynad la pynlong syndon ïa ki nongïalam jong kawei ka Block ban iehnohkam shisyndon na kane ka party.

Kane ka Block kadei ka Ranikor kaba dei ruh ka Block ka ban don bynta ban pynmih kyrtong ban ïakhun ïa ka ilekshon shiteng samoi na Langrin konstitwensi jong ka KHADC.

Ka jingthep vote ha katei ka ilekshon shiteng samoi kan long ha ka 28 tarik u Rymphang.

Kine ki nongïalam kadei ka Block kiba la iehnohkam ki don hapoh ka jingïalam jong u bah German June Nongsiang bad haryngkat kiwei ki nongkitkam kiba kynthup ïa u Working President bad Vice President.

Haba kren sha ki lad pathai khubor mynta ka sngi, u bah Nongsiang u la ong ka jingshim jong ki ïa kane ka rai kadei na ka jingpynbor jong ki paidbah kiba long ki nongkyrshan jong ka party hi ja ki ilekshon ba ladep.

U la ong, ki paidbah ki la thut noh ïa ka NPP kadei hadien jong ka jingleh lyndet ïa ka jingai jingmut jongki ha kaba ïadei bad ka rai bad ka jingthmu ban pynieng kyrtong da u briew uba kim mon satia.

Nalorkata, u la ïathuh ba kine ki nongïalam ka NPP kim shym la sngap ruh ïa ka sur jong uba bun balang hynrei la shu rai tang hapoh ka jingsngewthuh jingmut hapdeng jong ki Kata ha ka jingïalang jong ka party kaba la long ha ka 20 tarik Nohprah jong u snem ba ladep.

Katkum ka jingïathuh jong u bah Nongsiang, katei ka jingïalang ka rai ban pynieng da u bah Kitborlang Nongrem uba ki paidbah bad ka Block kim mon ne pdiang.

Na ka liang u president ba la iehnohkam u ong, ki paidbah kumjuh ka Block ka kwah ban pynïakhun da u bah Jotin Khardewsaw uba bat kum u Working President jong katei ka Block.

Lah ban shu pyntip pat, u bah Kitborlang udei uba bat kum u president ka South West Khasi Hills.

Shuh shuh, kine ki nongïalam kI la ong, ba ka kine ki khyndiat sngi kin dawa ruh ïa u MLA barim uba long u kyrtong ka party, u bah Martin M Danggo ban weng noh ïalade na ka NPP.

Ïa mynta u bah Danggo udei uba bat kum u Co-Chairman jong ka State Planning Board hapoh ka sorkar MDA.

Haba kylli pat ka synjam aiu kin shim, kine ki nongkitkam barim ka NPP kim Khlem pynpaw la kin leit pynïasoh shano hynrei ki la pyntip ba kin sa pyntip paidbah ynda la lah ban shim rai haryngkat bad ki paidbah.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589