Jurip bniah u Bah Hek ïa ki jaka ba bna don nongpang COVID-19 ha Nongmensong bad Pynthorbah

  • Shillongmail
  • July 26, 2020
  • Comments Off on Jurip bniah u Bah Hek ïa ki jaka ba bna don nongpang COVID-19 ha Nongmensong bad Pynthorbah

Shillong, Naitung 26: U MLA ka Pynthorumkhrah, u Bah AL Hek uba dei ruh u Myntri Sorkar ba dei peit ia ka tnad ka Koit ka Khiah ha ka nohphai sngi u Blei, u la leit ban jurip bniah ia ki jaka ba bna don nongpang COVID-19 ha Nongmensong bad Pynthorbah.

Ia u Bah Hek la ia synran lang da u Dr Aman Warr, DHS (MI), BDO, ki majistor, ki bor pulit,ki nongtrei ASHA bad Aganwadi, ki bor pyniaid shnong lem ki dkhot ki COVID-19 Management Committee na kine ki shnong, ki samla shnong, ki riewrangbah.

“Ngi la peit ha Nongmensong ha kaba la ai Containment Zone ha ki ar tylli ki jaka. Haba leit ngi lap ba ym donkam eh ban ai Containment Zone baroh kawei ka dong ne ka shnong namar kan ktah ia ka leit ka wan ki paidbah namar ym don nongpang COVID-19 ha kine ki jaka”, u la ong.

“Ngi ia mir jingmut lang bad i DHS bad majistor ban weng noh ia ka rai pynap Containment Zone noh ia ka dong bad ka shnong ban pyllait ia ka leit ka wan namar hangto ym don positive case shuh mynta lait sa tang ki ba la ia kynduh mar met ne lyngba kiwei pat ia kiba la test positive”, u la ong.

“La ong ba lai ngut kiba wanphai ki ïoh COVID-19 bad ka report ka ong ba ki dei na Nongmensong hynrei ynda la wad la lap ba dei ar ngut na Mawpat”, u la ong da kaba kyntu ia ki briew kiba leit test ne kiba la ngat COVID-19 ba kin ai ka jaka shong jaka sah ba thikna bad dei ban ai ki jingpynshisha da ki kot ki sla.
“Ha Pynthorbah ngi lap ba ki don lai ngut kiba ïoh COVID-19 bad ki jaka ba ki sah la dep pynhap ha ka Containment bad ki briew kim dei ban rung ban mih ha kito ki jaka. Ki bor pyniaid shnong ka Pynthorbah ki la shimkhia ban leh ia kaba donkam ban iada ia ka jingsaphriang ka jingpang COVID-19”, u la iathuh.

Ha kawei pat ka bynta, u Bah Hek u la ong ba kum ka Jylla kam shong shngaiñ na ka daw ka jingkiew sted ka jingpang COVID-19. “Lada ki paidbah kim sngewthuh ha kane ka por ka la ap ka jingma. Nga kyrpad ba ki paidbah iwei pa iwei ban iada dalade ialade ba kan ym wanrah jingma ha ka imlang sahlang baroh kawei”.

“Ka jingpang ka la kiew sted bha bad shi bnai mynshwa ka dang duna bha bad mynta ka kiew sted. Ka la don ka jingbatai lypa ba ka jingpang kan nang kiew. Ha Containment Area ne Containment Zone ym lah ban rung ban mih bad ki paidbah ki dei ban long adkar”, u la kyntu.

Na ka liang u Dr Aman Warr haba kren ha ki nongthoh khubor u la iathuh ba ha Nongmensong ia mynta ym don shuh ki positive Case namar la rah lut ia ki sha ki jaka sumar. “La leh Containment tang ia kito ki jaka ba don ki briew kiba ia jan bad kiba la ngat jingpang”, u la ong.

“Hynnin ngi la pyntip ba don lai ngut na Nongmensong hynrei ar ngut na kine ki dei kiba sah ha Mawpat hynrei u wei u dei u shipai ia uba la rah sha ka jaka sumar”, u la ong. “U la don tang u wei hynrei la dep rah ia u sha ka jaka ai jingsumar. Kumba long mynta ym don shuh ki positive case bad ngi leh containment ia ki contacts”, u la ong