Jurip u bah AL Hek ïa ka shnong Nongmensong

Shillong, Jylliew 11 : U Myntri ka tnad ka Koit ka Khiah ka jylla, Bah AL Hek hynne ka sngi Palei u la leit jngoh ia ka Nongmensong hadien ba arngut ki shi kurim na katei ka thaiñ ki la ioh ha u COVID 19.

Ha katei ka jingleit jngoh la donlang ruh u DHS, Dr Aman War, u DMHO ka East Khasi Hills, Dr M Basaiawmoit nalor u Rangbah Shnong bad kiwei kiwei.

Na ka Liang u Myntri hadien u ba la wan jngoh ia katei ka jaka u la kyntu ia ki nongshong shnong ba kim dei satia ban rit mynsiem namar ka sorkar ka la shimkhia ban pynbiang lut ki jingiada.

“Na ka liang jongnga kum u Myntri ka Koit ka Khiah bad ruh kum u MLA ka thaiñ nga kyntu ia ki paramarjan ba kim dei satia ban don ka jingpeit beiñ ia kito kiba ioh ia utei u khñiang jingpang,” la bynrap biang u Bah AL Hek

U DHS pat u la ong ba ka jingwan jong ki kum ka tnad ka long ban ai mynsiem ia ki paidbah bad ban kyntu ia ki nongshong shnong ba kim dei satia ban don ka jingpeit khmat ia ki nongshong shnong kiba don mynta ha ki jingsumar.