Jurip u bah Hek ïa ki surok kiba hapoh ka shnong Umkdait

Shillong, Naitung 09: U MLA jong ka Pynthorumkhrah u Bah AL Hek, uba dei ruh u Myntri ba dei peit ia ka tnad ka Koit ka Khiah hapoh ka Sorkar Jylla u la ong ba shen yn sdang ban pyntrei noh ia ki surok shnong ha Umkdait, Nongmensong tang mar ia poi ki bnai ba rang ka bneng.

Ïa kane u Bah Hek u la iathuh ha ki nongthoh khubor ha ka step sngi Palei hadien ka jingwan jurip ia kiba bun tylli ki surok kiba la jot bad donkam ban shna thymmai hapoh ka dong Umkdait, Nongmensong.

U MLA u la ioh ruh ban sakhi ba ki surok ki la long kiba la jot bad khohruh khohram bad kiba buh jingman ia ki nongleit nongwan khamtam ha ka por slap mynta.Wat hapdeng u slap, u Bah Hek u la leit hi ban jngoh ia ki katto katne ki surok da kaba iaid kjat na kawei ka bynta sha kawei pat khnang ban ioh sakhi hi da la ki jong ki khmat ia ka jingeh kaba ki paidbah nongleit nongwan ki iakynduh namar ka jingsniew jong ki surok.

“ Ka jingwan hiar jurip mynta ka sngi sha kane ka shnong ka long hadien ba la ioh pdiang ia ka jingthoh na ka Dorbar Shnong Nongmensong bad Seng Samla halor ka jingdonkam ban pynbha ia ki surok bad ki lynti syngkien hapoh ka shnong”, u la ong.

“La buh ia ka skhim na ka bynta ka surok kaba long haduh 4 kilometer tam bad ka jingmang pisa na ka bynta kane ia kaba la dep ban mang ka la kot shaduh kumba T.2 klur eiei bad kane ka skhim surok ka dei beit jong ka PWD”, u la ong.

U la iathuh ba ki don ki bynta jong ka surok ia kiba yn shu maramot bad don ruh ia kiba yn shna thymmai kata kin don ki ban siang da ka surok rong bad ruh ki ban siang da ka dewbilat.

Ha kane ka jinghiar jurip ia u Bah AL Hek la synran lang da u Assistant Executive Engineer ka PWD (Roads) NH Shillong, By-pass Sub-Division, u Bah A Syiemlieh, u Junior Engineer kane ka sub-division, Bah P Mukhim, ki nongialam shnong, ki nongialam ka Seng Samla bad kiwei kiwei.