Ka 2022 National Games ka dang don ha lynti ka jingpynkhreh: Conrad K Sangma

Shillong, Lber 21: U nongthaw-ain ka Bharatiya Janata Party (BJP) na South Shillong, u Bah Sanbor Shullai u la pynpaw ba ka Constituency jong u ka dei ban ioh jingmyntoi na ka National Games ka ban pynlong ha ka jylla Meghalaya ha u snem 2022.

Haba shim bynta ha ka kynta kylli jingkylli ha ka sngi Balang, u Bah Sanbor u la kwah ban tip ba la ka don ne em ka jingtyrwa ban shna ia ki jaka ialehkai ha South Shillong na ka bynta ka 2022 National Games.

Haba u Myntri ka tnad ialehkai ka sorkar jylla, u Bah Banteidor Lyngdoh um shym la ai ka jubab kaba shai, u Bah Sanbor u la dawa ka jingpyn-thikna na u Myntri ba dei ban tei kawei ka Indoor Stadium bad kawei ka Outdoor Stadium ha ka Constituency jong u.

Haba tuklar lang halor kane ka kam, u Myntri Rangbah ka Jylla u Conrad K Sangma u la ong ba ka National Games ka ban pynlong ha u snem 2022 ha ka jylla Meghalaya ka dang don ha ka lynti jong ka jing-pynkhreh bad pynpaw ruh ba kane ka lympung ialehkai ka dei kaba kongsan bad ka jingsarong na ka bynta ka Jylla.

“Kane ka dei ka kabu ban wan rah ia ka jingkylla ha ka jylla “, la ong u Conrad ha ka kynta kylli jingkylli ka Ing Dorbar Thaw-ain ka jylla. U la ong ruh ba ka Organising Committee ba la khlieh da ma u hi ka dang ïaid sha khmat ha ka jing-pynkhreh.

U la ong ba ka Organising Committee ka donkam ia ka jingai jingiatrei lang na ki tnad bapher bapher bad donkam ruh ka jingai jingmut. “Ngi donkam ia ka tnad PWD ban pynheh ia ki surok bad ka Tnad kam jngoh-kai pyrthei ban leh la ka bynta “, la ong u Conrad.

Kham ha shwa, ha ka jingkylli ba la wanrah da u MLA khlem seng na Nongkrem Constituency u Bah Lambor Malngiang, u Myntri ba dei peit ia ka tnad kam ialehkai u la ong ba ka sorkar ba mynshwa ka la mynjur ban shna lai tylli ki jingtrei kynthup ka Indoor stadium bad kawei ka Outdoor stadium ha Ampati, South West Garo Hills district bad kawei ka indoor stadium ha Pomlakrai, Nongkrem constituency, East Khasi Hills district.

U Bah Banteidor Lyngdoh u la ong ba ba ka Indoor Stadium ha Pomlakrai yn sa tei ha ka jinglut kaba long 22.75 crore tyngka.