Ka CAA kadei kawei na ki mat ka ban ngan ïakren ha Parliament: Dr. Kharlukhi

Shillong, Jylliew 19: U MP ba thymmai na Meghalaya sha Rajya Sabha, u Dr. Wanwei Roy Kharlukhi u la ong ba kum u MP un sa rah biang ia ka ishu Citizenship Amendment Act (CAA) ha Parliament, khamtam hadien ba ka Meghalaya ka la mynjur ia ka Resolution ban pyllait ia ka jylla na katei ka aiñ.

“Kum u nongmihkhmat jong ka MDA, nga hap ban buddien ia ka bad ka Delhi,” u la ong hadien ba u la jop ia ka elekshon MP Rajya Sabha kaba long ha kane ka sngi Thohdieng.

Da kaba ai khublei ia baroh ki MLA kiba la jied ia u, u Dr. Kharlukhi u la ong ruh ba un pyrshang lut ka bor jong u ban shakri ia ki paidbah ka jylla.

U Kharlukhi u la poi sha ka saiñpyrthei da kaba sdang na ka Hills People Union kum u general Secretary ka youth wing ha u snem 1986. U la dei ruh uwei na ki nongseng ia ka Meghalaya Students’ Union, nangta ruh kum u nongialam ka North East Region Students’ Union kabaa thaw ha u snem 1981.

U Kharlukhi uba la kha bad u la heh la san ha Jowai, u la pyndep ia ka Master of Philosophy ha ka History hynrei kum Docotorate Philosphy ha ka Political Science.

U la dei ruh uwei na kiba jan tam bad u Lamphang barim ka Lok Sabha, u Purno A Sangma. Ha ka por ba u Purno u don bad ka Nationalist Congress Party, u Kharlukhi u la bat kum u State President naduh u snem 2007 haduh 2012.

Na ka liang u Myntri Rangbah ka Jylla ba dei ruh u National President ka NPP u la ong ba lyngba katei ka jingtbit kaba u la don lypa khlem artatien u Kharlukhi un lah ban rah ia ki ishu ba donkam jong ka jylla ha Parliament.

“Nga ngeit skhem ba un pynsngew ia ka sur ba jam kiba iadei bad ka ishu jong ka Meghalaya bad North East ha Parliament,” ong u Conrad da kaba ai ka jingkhublei ia baroh kito ki MLA kiba la pynjop ia u Kharlukhi.