Ka jingdawa pynkynriah ïa ki harijan na Them Ïew Mawlong: 2018 – ka Sur U Paidbah, 1996 – JACSO

Shillong, Jylliew 06: Ka jingïakhih paidbah ban dawa ban pynkynriah ïa ka jaka sah ki harijan kaba don ha Them Ïewmawlong sha kiwei pat ki jaka hapoh ka nongbah Shillong watla kam long kaba seisoh hynrei la lah pat ban nuksa ïa ka jingkhih win jong u paidbah khlem ka jingdon mano mano ban ïalam ïa ki.

Kumba ju long ha kiwei ki jingïakhih la ka long ban dawa ban pyntreikam ïa ka Inner Line Permit (ILP), ka jingdawa pyntreikam ïa ka Village Administration Bill (VAB) bad kiwei ki mat jingdawa kiba ka jaitbynriew Ri lum Khasi-Jaiñtia ka ïatyngkhuh bad mad jingeh, ju ïohi ban don ki seng ne ki riewkhmat ban ïalam.

Hynrei dang shen ha ka jingïakhih kaba neh haduh san sngi la ïohi ba ka jingïaleh bad ka jingdawa ka khlem shym lamih na kino kino ki seng hynrei la sawa shuwa na ka “Sur U Paidbah’’ kata ha ka miet jong ka sngi Palei.

Kane ka jingïakhih ka la sdang ha ka sngi Palei kata ha ka step jong ka 31 tarik u Jymmang na ka jingjia ba shah shoh ki lai ngut ki khynnah ha ki katto katne ngut ki briew kiba sah ha Them Ïewmawlong kiba dei ki harijan ne kiba baroh ngi tip kum ki kharmetor.

Kum ban shu kdew kine ki lai ngut ki kynthup ïa arngut ki khun shynrang bad uwei u pyrsa jong u draibar bus saw (JNNURM) bad uwei na ki, u la mynsaw kham jur.

Mar ïa pur ki khubor jong katei ka jingjia, ha katei hi ka janmiet, ki draibar bad ki nongbud jong ki bus saw ki la ïa mih paidbah da ka jingthmu ban leit ban tur sha ka jaka sah ki harijan ha Them Ïewmawlong.

Ka jingwan kloi jong ki pulit ka la pynlong pat ïa katei ka kynhun ban nym lah ban leit sha katei ka jaka tangba namar kadei ha ka por mynmiet, ki paidbah kiba sah na ki dong kiba marjan kum na Mawkhar, Jaiaw, Wahthabru, Mawlai, Mawprem ki la sdang ban wan snohkti bad kane ka jingthmu leit tur sha Them Ïewmawlong ka la poi sha u pud ban don pat ka huri hura kaba poi shaduh ka jingïakynad hapdeng ki paidbah bad ki pulit.

Ha katei ka miet katba ka jingiakynad ka dang khluit la sawa ïa ka “Sur U Paidbah” kiba la dawa ban weng noh mardor ïa ki harijan na katei ka jaka.

La sakhi pat namarba ki paidbah ki la bitar ba kim ïoh ban tur sha katei ka jaka, ki la dawa na ki pulit ban kem mardor ïa kiba donkti ban shoh ïa ki lai ngut ki khynnah bad ruh na ka sorkar ban pynkynriah noh ïa ka jaka sah sha kiwei pat ki jaka.

Hynrei na ka jingbym lah ban ai jingkular jong ki bor pynïaid distrik bad ki pulit, ha katei ka miet ka lamih ka huri hura kaba ki paidbah ki la sdang ban kawang maw kumjuh da ki dieng ïa ki pulit haduh kaba la pynlong ïa ki na ka jingbymlah ban tem ban shu siat noh da ki jingsiat pynsat khmat (tear gas) sha ki jaka kiba ïalum u paidbah.

Bad la sakhi ba kane ka huri hura, ka la neh bad bteng wat haduh ka sngi ba bud bad haduh ban pynlong ïa ka bor pynïaid distrik ban pynjari da ka korphiw ha ki jaka kiba kynthup kum ka Jaiaw, Mawkhar, Umsohsun, Riatsamthiah, Wahiingdoh, Mission, Mawprem, Lumdiengjri, Lamavilla, Qualapatty, Wahthapbru, Sunny Hill, Cantonment, Mawlong Hat kumjuh ruh ka Cantonment Beat House.

Na ka jingjur jong ka jingïakhih, ka sorkar Meghalaya Democratic Alliance (MDA) kaba lamkhmat da ka seng NPP hapoh ka jingïalam jong u Conrad Kongkal Sangma kum u Myntri Rangbah kam banse ban thaw da ka High Level Committee ban shong bishar ïa ki kot ki sla kiba ïadei kumno ban lah ban pynurlong ïa ka jingdawa jong ka “Sur U Paidbah”.

Kum ban shu pynkynmaw, ha u snem 1996 ruh ka ladon ka jingdawa ban pynkynriah bad ban weng noh ïa ki harijan na katei ka jaka hynrei ha kato ka por kadei lyngba ka Joint Action Committee of Social Organizations (JACSO).

Ka JACSO kadei ka kynhun jong ki lai tylli ki seng kaba kynthup ïa ka KSU, FKJGP bad ka SSSS.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589