Ka jingïap ki sniang kam dei satia na ka African Swine Fever: Dy CM

Shillong, Jymmang 20: U Symbud Myntri Rangbah ka jylla, Bah Prestone Tynsong ha ka sngi Balang u la ïathuh ba ka jingïap jong ki 30 tylli ki sniang naduh ka 01tarik u Jymmang haduh ka 15tarik kam dei satia na ka daw ka jingpang African Swine Fever. 

Ïa katei ka mat la wanrah da u MLA ka Mawlai, Bah Process T. Sawkmie ha ka sngi sdang jong ka Dorbar Mangtyngka ha kane ka sngi Balang halor ka jingiap kynsan jong ki sniang ha ka jylla.

U la ogn ruh ba na ka daw ka jingphriang jong katei ka jingpang ha ki jylla ka thaiñ shatei lam-mihngi jong ka Ri, bun ki nongri sniang ki la kynduh bun ki jingeh bad ki jingdunong bad kumta u la kyntu ia ka sorkar jylla ba kadei ban ai ka jingïarap pisa na ka bynta jong ki. 

U Bah Sawkmie u la ong ruh ba ka sorkar kadei ban pynbiang wat da ki ambulance na kabynta ki sniang kiba pang lane kiwei kiwei ki jingri khamtam ha kum kane ka por ba ym don satia ki kali na ka daw ka jingkhang dam ia ka jylla. 

Haba jubab halor ka call attention ba la wanrah da u MLA ka Congress, na ka liang u Symbud Myntri Rangbah u la ong ruh ba na ki 30 tylli ki sniang kiba la iap naduh ka taiew ba nyngkong jong u Jymmang, 13 tylli na kitei kiba ïap kidei na ka daw ka Classical Swine Fever. 

U la iathuh ruh ba 9 tylli kiwei pat ki sniang ki ïap ha East Khasi Hills,  12 tylli ha Ri-Bhoi District, 2 tylli ha West Khasi hills, 4 ha Mairang sub-division, 1 ha West Jaintia Hills, 1 ha East Garo Hills bad  1 ha East Jaintia Hills.

“La post mortem bad la shim ruh ia ka sample na kitei ki sniang bad la phah pat ia ki sha ICAR Umiam ban test ia ki. Katkum ka report ba la iohlum, la kdew ba ka jingiap kadei na ka Classical Swine Fever ka jingpang kaba iapher na ka African Swine Fever. Kane ka jingpang kam dei satia kaba don jingma namar ka jingiap na kiba ioh ia ka ki long tang kumba 1.4 persen bad ki dawai ruh ki don ban sumar ia ki,” u la ong. 

Nalorkata, u Symbud Myntri Rangbah u la iathuh ruh ba baroh ar jait kitei ki jingpang kim dei satia kiba lah ban ïa bit sha ki briew. La pyntip ruh ba na ka liang ka sorkar ka la dep ruh ban khang ia ka jingpynpoi sniang na shabar jylla naduh ka taiew ba khatduh jong u Iaiong. 

U la ong ruh ba nalor ba ki la khang ia ka jingpynpoi ia ki sniang bamdoh na kiwei ki distrik, la kyntu ruh ia ki jaka ri sniang jong ki paidbah bad ruh jong ka sorkar ba ki dei ban da bud pyrkhing ia ki kyndon khamtam ban leh khuid bad ban synreit dawai ia kitei ki jaka ri jingri. 

U la kyntu ruh ba lada don kino kino ki jingiap kynsan jong ki sniang, ki paidbah kidei ban pyntip mardor sha ki ophisar jong ka tnad.
La iathuh ruh ba ki la don haduh 139 tylli ki rapid surveillance team ban peitngor halor katei ka jingpang. 

Ha kajuh ka por, haba iadei pat bad ka bai luksan na ka bynta ki nongri sniang, u Bah Prestone u la ong ba ka sorka jylla kam pat don jingthmu satia ban kyrshan pisa sha ki hynrei u la pyntip pat ba ki nongri sniang ki ioh ia ka jingsumar ei lada jia ba ki jingri ki shah ktah ha katei ka jingpang. 

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589