Ka jingshong-kha khynnah, ka jingpep skul shiteng por ki dei ki jingeh kiba ka imlang sahlang ka ïa kynduh: St Edmund’s College SW Dept.

  • Shillongmail
  • March 22, 2018
  • Comments Off on Ka jingshong-kha khynnah, ka jingpep skul shiteng por ki dei ki jingeh kiba ka imlang sahlang ka ïa kynduh: St Edmund’s College SW Dept.

Shillong, Lber 22: Ka jingshong-kha khynnah, ka jingpep skul shiteng por bad ka jing-armet ha ka rta kaba ym pat rangbah bha ka dei kawei daw bah ban pynlong imlang sahlang kaba tlot ha bun ki liang la ka dei ha ka koit ka khiah, ka ioh ka kot bad kiwei.

Ia kane la pynpaw da ki nonghikai ka St Edmund’s College, Shillong (Social Work Department) ha ka jingiakren bad ki nongthoh khubor ha ka shnong Mawkma kaba don 3 kilometer na ka surok bah Shillong-Sohra bad kaba lad na ka shnong Sohrarim.

Ka St Edmund’s College (Social Work Department), ka la pynlong ia ka Rural Camping ba shi taiew ha ka shnong Mawkma bad Laitlyndop, kum shi bynta ka jingpule ki khynnah Bachelor bad Master of Social Work kane ka skul pule.

Kane ka kynhun ba 90 ngut tam ki khynnah pule la ialam khmat da ki nonghikai ba kynthup ia ka kong Aibakor Kharbuli, ka Kong Doreen Rapthap bad ka Kong Sakani Niangty.

Kum shi bynta na kane ka Rural Camping, kane ka tnad pule ka la pynlong ia ka Health bad Eye Camp hynne ka sngi ha ka shnong Mawkma.

Ia ka Health Camp la pynlong ha ryngkat ka jingiatrei lang bad ka Nazareth Hospital, Shillong bad ia ka Eye Camp pat la pynlong ryngkat ka jingiatrei lang bad ka Bansara EyeCare.

Ha kine ki jingai sumar ei ia ka met bad ki khmat la wan ban ia shim bynta ki khynnah skul jong ki skul bapher bapher kane ka shnong, ki nongshong shnong, ki nonghikai bad kiwei kiwei pat.

Shuh shuh, ka Social Work Department ha baroh shi taiew ka la pynlong ia ki program ai jinghikai bapher bapher sha ki nongshong shnong ha kaba ia dei bad ka rep ka riang, ka koit ka khiah, ka jingleh khuid, ka jing-iamir jingmut bad ki samla lem bad kiwei kiwei kiba ia dei bynta bad ka imlang sahlang.

“Ka jingthmu ba kongsan kane ka Rural Camping kaba long ruh shi bynta na ka lain pule ki khynnah ka long ban pyn-sngewthuh ia ki halor ka jingim jingman ka imlang sahlang ha ki jaka nongkyndong”, la ong ka Kong Aibakor Kharbuli.

“Ha kane ka camping ngi ioh ruh ban ia mir jingmut bad ki nongshong shnong, ki samla, ki longkmie longkpa halor ka jingim bad ki jingiakynduh ba man la ka sngi ha ka jingim jong ki”, la ong shuh shuh ka Kong Aibakor.

“Shi bynta ki khynnah pule jong ngi ki wad Jingtip ba bniah ha kaba ia dei bad ka koit ka khiah ki samla bad ki jingeh kiba ki kynduh”, la ong ka Kong Sakani.

“Ha kaba ia dei bad kane ka Health Camp bad Eye Camp, ngi don ka jingiatrei lang bad ka Nazareth Hospital bad ka Bansara EyeCare bad ka long ka bynta ban pynlong ka jingpeit bniah ia baroh ha kaba ia dei bad ka koit ka khiah”, la ong ka Kong Doreen Rapthap.

“Kum ha kane ka shnong ka don ka Sub Centre hynrei ym pat ba ki doctor ki don baroh shi taiew bad kane ka buh jingeh iaki nongshong shnong”, la ong ka Kong Sakani.

“Kane ka Health bad Eye Camp ka iarap ban lap ia ki jingpang bad kiba lah ban sumar kloi noh”, la ong ka Aibakor.