Ka KAS kan bteng ban ïakhun ban dawa pynrung ïa ka ktien Khasi ha ka khyrnit ba phra

Shillong, Nailur 11: Ka Khasi Authors Society, ka kynhun kaba iakhun na ka bynta ban ioh jingithuh noh ia ka ktien Khasi ha ka sngi Thohdieng ka la rakhe ia ka jingdap 41 snem ka jingseng ia ka.

Ha katei ka jingrakhe kaba long ha ka hall jong ka Arts and Culture la wan ban shim bynta lang da u Myntri ka tnad Arts and Culture Bah AL Hek nangta u CEM ka KHADC Bah Titosstarwell Chyne kum u kongsan bad symbud kongsan.

Haba kren ha ka jingialang u kongsan u la kyntu jur ia ki stad thoh ha ka ktien Khasi ba kin wanlang ha kawei ka rynsan ban pynmih ia ki kyntien kiba ki paidbah kin ym klumar ha ka rukom speldak u la iathuh ruh ia ka bynta ba kum ka sorkar ka iakhun na bynta ban pynrung ia ka Ktien Khasi ha ka 8th schedule.

Na ka liang u CEM pat u la iathuh ba ka Council ka don ha ryngkat ryngkat ban kyrshan ia ka KAS ha ka jingiakhun ban ioh jingithuh noh ia ka ktien Khasi.

Ha shwa kane u president ka KAS, Dr. DRL Nonglait u la iathuh ba watla kum ka Society ki la iakhun borbah na bynta ka Ktien Khasi ban rung ha ka Khyrnit ba 8 hynrei ki jingiakhuh pyrshah Citizenship Amendment Act bud pat sa ka ishu COVID-19 ka la ktah jur ha ka jingbuddien ia kane ka kam.

 Ha kawei pat ka liang u la iathuh ruh ba ha ka jingshem jong ki ki lap ba haduh mynta ka jingpyndonkam ia ka ktien Khasi ka dang duna haduh katta ha ki ophis treikam jong ka sorkar.

U la ong ba kiba bun ki tnad ki pyndonkam da ka Ktien Khasi tang haba kren hynrei ha ka thoh ka tar pat ka dang iaid beit da ka Ktien phareng.

Ha kane ka sngi ki Kongsan ki la pyllait ruh ia ki kot ba la thoh da ki laingut ki  nongthoh kot ba paw ka jylla.

Shwa ban sdang ia ka prokram ka la don ruh ka jingpule poitri na u Babu Andreas Sunn.