Ka Lawsohtun kan pahuh Um lyngba ka projek T. 3.30 klur na Riat Tynrah

Shillong, Nailur 04: Ki nongshong shnong ka Shnong Lawsohtun ki don mynta ha pdeng ka jingkyrmen bad khmih lynti ba kin sa ïoh ka um bam um dih kaba pahuh hadien ba ka tnad Public Heath Engineering (PHE) ka Sorkar Jylla ka la buh mang tyngka T. 3.30 klur ban tan um na Riat Tynrah, Law Syiem ban pynbiang um ia kane ka Shnong.

Ia u mawnongrim kum ka dak ban sdang noh ia kane ka projek tan um la plie pyrda ha ka Sngi Thohdieng da u Myntri ka tnad PHE, Bah Samlin Malngiang ha ryngkat ka jingiadon lang u Bah Hamletson Dohling, MLA ka Mylliem Constituency uba dei ruh u Myntri ka tnad Urban Affairs ka Sorkar Jylla ha Lawsohtun Block VI.

Kiwei kiba la sakhi lang ia ka jingplie mawnongrim ki kynthup ia u Addl. CE ka tnad PHE, Bah D War ryngkat ki ophisar rangbah na kane ka tnad, u Bah Mitchell Wankhar, Advisor ka DS Lawsohtun uba dei ruh u MDC ka Laban-Mawprem, Bah Lurshai Shylla, Rangbah Shnong, Bah Bankhraw Sohtun, Secretary ryngkat kiwei pat.

Kane ka projek tan um kan long kham kyrpang ia ka Block I, Block II bad Block III ka Shnong Lawsohtun. Ia kane ka projek la mang tyngka lyngba ka Rural Development Infrastructure Fund (RIDF)-XXV. 

U Bah Samlin Malngiang haba ai jingkren u la pyntip ba ia ka tender na ka bynta ban pyntrei noh ia ka projek la dep khot bad la khmih lynti ba yn sdang noh ha u bnai Risaw. “Ka jingïatreilang ka Dorbar Shnong, ki ophisar ka tnad PHE, u MLA kan pynurlong ia kane ka projek bad pynbiang ia ka um bam um dih na ka bynta ki nongshong shnong ka thaiñ”, u la ong.

Na ka liang u Bah Hamletson Dohling, MLA kane ka thaiñ kaba hap ha Mylliem Constituency u la pynpaw ka jingïatreilang jong baroh kiba ia don bynta khamtam na ka liang ki trai jaka kiba la ai sngewbha ia ki jaka jong ki ban ioh pyntyllun ia kane ka projek na ka bynta ki nongshong shnong ka Lawsohtun.