Ka Rukom Sumar AYUSH bad ki Nongsumar Trai Ri

Da U Bah George B. Lyngdoh – MLA Umroi

Ka 14 tarik Nailar 2020 ka long ka sngi ba sah kynmaw ha ka histori jong ka Umroi Constituency. U Bah AL Hek, Myntri jong ka koit ka khiah, u la plie ïa ka AYUSH aspatal banyngkong tam jong ka Jylla jong ngi ha Bhoirymbong. Ïa kane ka aspatal la sdang shna ha ka 30 Nailar 2012 bad la pyndep pat ha ka 14 Kyllalyngkot 2014. Naduh u snem 2018, nga la pyrshang ban wanrah ïa ki lad jingïarap na ki bor Sorkar. Da ka jingïarap bad jingkyrshan jong kiba bun ki heh Sorkar na ka tnat jong ka Koit ka khiah, ngi la lah ban pynurlong ïa kane ka jingthmu ha ka 14 Nailar 2020.

Ha ka ‘AYUSH’, don san tylli ki lad rukom ai dawai kiba kynthup ïa ka Ayurveda, ka rukom ai dawai kynbat da kaba pyndonkam ïa ki kynbat na ki lum Himalaya; ka jingkilan met Yoga; ka jingsumar dawai Unani, kaba la sdang na Ri Greece; ka jingsumar Siddha, kaba dei ka jingsumar kynbat na ki jylla shathie jong ka Ri India; bad ka jingsumar Homeopathy kaba la pynbit pynbiang u Doktor na Ri Germany, u Samuel Hahnemann. Ki paidbah kin myntoi shibun na kine ki lad jingsumar namar ki long kiba la pyrshang la bun bun snem. Ka jingdon jong ki doktor, ki nos, bad ki nongaidawai ha kane ka aspatal AYUSH kan long ka jingailad ai lynti ïa ki paidbah ban sumar ïa ki jingshitom bapher bapher. Ka jingsumar AYUSH kan sa dang saphriang ha kylleng ka Jylla lyngba kiwei pat ki aspatal ba la ai jingkyrshan da ka Ministry of Ayush jong ka Sorkar Pdeng. Hajan jong ka jaka sumar NEIGRIHMS, ka la don ruh ka North East Institute of Ayurveda and Homeopathy (NEIAH) kaba la don la katto katne snem, bad bun bah kiba la ïoh jingïarap na kane ka aspatal. Nga kyrmen ba ka aspatal AYUSH ha Bhoirymbong kan ïatreilang bad don ka jingïadei kaba jan bad ka NEIAH ban kham myntoi shuh shuh ki paidbah. Kumta, ngi la sngewthuh ba ka ‘AYUSH’ ka dei ka jingsumar lyngba ki dawai kynbat, kilan met bad ka jingpynkhem da ka umphniang. Kine ki dei kiba hiar pateng naduh hyndai bad ngi ïohi ba mynta ka Sorkar Pdeng ka la pynmih syndon da ka tnat treikam (Ministry) kaba kyrpang ban pynsaphriang ïa ka rukom sumar AYUSH ha kylleng ka Ri. Kumba long mynta, ki nongsumar kynbat ki ïoh jingkyrshan bha na ki kompeni bapher bapher kiba pynmih ïa ki dawai shut bniat, umphniang ba pang met, bad ki dawai bapher bapher kiba la ïaid ha kylleng ka Ri, kum ka kompeni Gaia, Patanjali, Herb Pharm, Bio-Botanica, bad kiwei de. Ka jingkiew stet jong ka Pantanjali ha kine ki khyndiat snem ka pyni shai ba ki nongsumar trai ri, bad ki dawai ba ki ai, ki long kiba ïaid ïew bha.

Kawei kaba ktik jingmut ïa nga ka long ba ha ka Jylla jong ngi, ngi don shibun bah ki nongsumar da ki dawai kynbat, ki nongsumar khñiang, sumar bniat, sumar kdiah shyieng bad pyrsad ding. Ka la don shisha ka jingstad ha kine ki nongsumar dawai Khasi ha ka Jylla. Hynrei, wat hapdeng ki jingpyrshang ba bun, ym pat don ba ithuh satia ïa kine ki sap ki phong ki jong ki.

Ki don ki dawai umphniang bapher bapher kiba la shna da ki nongsumar Khasi jong ngi. Kawei na ki nuksa ka dei ka um soh kwit kaba ju pyndonkam ha ka por ba jur jingshit, ki phlang kynbat ban sumar bniat, bad kumta ter ter. Kaba ju kham ïoh jingïthuh na ki paidbah ruh ka dei ka jingsumar shyieng ne ba khem met haba laitdoh ne jrai ki thied. Kine ki dei ki sap bad ki jingstad kiba la don lypa bad kiba ngi lah ban kyntiew shakhmat.

Ka jingaijingmut jong nga ïa u Bah AL Hek, Myntri ka Koit ka Khiah, bad ki nongpeit ia ka tnat AYUSH jong ka Jylla, ka long ba ngi dei ban thaw lad ïa ki nongsumar trai Ri jong ngi. Hato ka tnat AYUSH jong ka Sorkar Jylla kan plie lad ne em ïa ki nongsumar jong ngi?

Ngi tip b aka skulbah NEHU bad kiwei ki la pyrshang bad wad bniah bha halor kane ka phang, hynrei ngi donkam ruh ban ïohi ba ki tnat sorkar kin trei ryngkat-ryngkat. Lada ngi lah ban ai jingïarap ïa ki skulbah bad ki kynhun stad saians ban peit bniah ia kine ki rukom sumar kan wan ka jingshaniah ba pura na kylleng jong ka pyrthei. Kane kan kyntiew ïa ki rukom sumar ba la don lypa ha ka Jylla ka jong ngi. Ym tang ba ka ngi lah ban ri kyndong bad pynjanai ïa ka jingstad jong ki longshuwa ki jong ngi, hynrei ngi lah ruh ban sdang ïa ka sobjek pule ha ki skul, kolej bad ha ki skulbah. Kane kan wanrah ïa ka jingïohkam ha ki rukom bapher bapher. Lada kyrshan borbah ïa ki nongsumar trai Ri jong ngi, kan khring ïa ki briew sha ka Jylla ym tang ban ban wan jngoh kai pyrthei hynrei ban wan phah sumar ïa ki jingshitom bapher bapher. Ngi donkam ban bteng ia ki jing dawa na ka Sorkar Jylla haduh ban da poi sha ki tyndong skhor jong ka tnat AYUSH ha Sorkar Pdeng. Ïa kane ka rukom khring ïa ki nongjngoh kai la khot ka ‘Medical Tourism’ bad la pyntreikam ïa ka la bun snem ha ka jylla Andhra Pradesh, Kerala, Karnataka bad kiwei de.

Ka jingplie ïa ka aspatal AYUSH ha Bhoirymbong ka long ka jingsdang bathymmai. Lyngba kane ka jingsdang, nga kyrmen kin mih bun ki lad ki lynti nangne sha khmat. Ngi donkam ban pynsaphriang ïa ka jingmut ban ïoh ka jingkyrshan ba pura na ka sorkar khamtam na ka bynta ban kyntiew ïa ka nam jong ka Jylla lyngba ki rukom sumar ki jong ngi.