Ka samla kaba ïap ha Delhi kadei na ka thaiñ Marngar hajan Nongpoh: Pulit

Nongpoh, Lber 28: Ka samla briew kaba ki pulit ka nongbah Delhi ki la ïoh ban tam na ka jaka sah kaba don hapoh katei ka nongbah kadei kaba na ka shnong Kharpati, Marngar kaba don kumba 5 km eiei na Nongpoh.

Kane ka samla briew kaba la ithuh kyrteng kum ka Wandarisa Kongor (26) kadei kaba la ïap hapoh ka ïingsah ka jong ka kaba don hapoh Munirka House no. 262 (A), hajan Babulal Chowk, Delhi.

Haba ïadei bad kane ka jingïap jong katei ka samla, ki pulit ka nongbah Delhi ki dang pynlong ïa ka jingtohkit bad ka don ka jingsuba ba ïoh ka la shah pynïap.

U Superintendent of Police ka Ri Bhoi District, u Ramesh Singh, u la ïathuh, ba ki bor pulit ka district ki la ioh ïa kane ka jingtip halor ka jingïap jong kane ka samla briew kaba na Ri Bhoi district hynnin ka sngi, ha kaba la ïathuh ruh, ba katei ka metïap kaba la lap da ki pulit ka nongbah Delhi ka dei kaba la kham slem bad ruh ka bym ithuh durkhmat shuh.

Katkum ka khubor kaba la thoh da ki nongthoh khubor na nongbah Delhi, la ithuh ïa kane ka metïap jong katei ka briew, dei lyngba ka jinglap ïa ka Aadhar card acknowledgment slip kaba kane ka samla briew ka la dep ban applai.

Di lyngba katei ka jingtip kaba khyndiat, la lah pat ban wad jingtip ia ki bahaing hasem jong ka bad dei hadien ka jingtreishitom jong ki bor pulit ba la lah ban ithuh ia ki bahaïing hasem jong kane ka briew kaba la khlad noh ha nongbah Delhi.

La ïoh jingtip ruh, ba na ka liang ki bor pulit ka district ki la phah ïa ki ophisar jong ki ban synranlang ia ki bahaïing jong kane ka samla briew sha nongbah Delhi, bad kumjuh ban pyndep ïa ki jingdonkam khamtam ia ki kaiphod jong kane ka jingjia yn lah pat ban pyndep noh shen. Na ka liang ki bor pulit ka district ki dang ap ruh ia kaiphod halor kane ka jingjia.

U Deputy Commissioner of Police (South-West), u Milind Dumbere, u la ong, “Shi bnai mynshwa, kane ka kynthei ka trei ha kawei ka Call Center ha Gurugram bad sah ha ka ïing wai ha Munirka. Ïa kiba haïing jong ka la dep ban pyntip bad ïa ka metïap jong ka la phah ban leh ia ka post-mortem”.

U trai ïing u la ïathuh ba u la ïohi khatduh ia ka ha ka sngi Thohdieng jong ka taïew ba la dep ha ka por janmiet. Ki pulit ki la ong ba ki dang ap ïa ka kaiphoit na ka Post Mortem ban lap bniah shuh shuh ha kaba ïa dei bad kane ka jingjia.

Kumjuh ruh yn sa lah ban tip la ka la don ne em ka jingthombor ïa ka long rynieng jong ka. Ki pulit ki ïathuh ruh ba ki tiar ki tar ha ïing jong ka kim shym la sakma satia.

Shuh shuh ka khubor na u heh pulit la ong, “Ka metiap la imat ka la don kumba san sngi eiei. Ngin dang wad bniah ïa ki Call Records jong ka bad ngin peit bniah ruh ïa ki CCTV footage kiba don ha kane ka jaka “.

Ka jingujor halor ka jingkynnoh shah pyniap la dep ban buh ha Vasant Vihar Police Station, bad ïa ka metiap la buh ha Safdarjung Hospital, Delhi.