Ka shong ha ki nongïalam ka HSPDP halor ka kam bhah Myntri: Samlin

Shillong, Nailur 15: U Bah Samlin Malngiang, MLA ka seng sainpyrthei Hill State People’s Democratic Party (HSPDP) na Sohiong Constituency, Myntri ha ka Sorkar Meghalaya Democratic Alliance u la pynpaw ba u ieh ha ka jingiapynbeit ka Party halor ka kam kaba ia dei bad ka jingbhah kam Myntri hapdeng jong u bad u Bah Renikton Lyngdoh Tongkhar, MLA ka HSPDP na Mawkyrwat Constituency.


Hynrei u la pynshai ba naduh kaba sdang kam shym la don ka jingiakren lypa ne kano kano ka soskular ban pynbeit ban bate ia ka shuki Myntri mar shiteng ka samoi hapdeng kine ki ar ngut ki MLA na ka Party.


“Kam shym la don satia ka jingiakut lypa ban shim mar shiteng samoi ia ka shuki Myntri ha ka Sorkar, namar ha ka por ba nga shim smai kum u Myntri ha ka sorkar MDA, ka Party kam pat don satia ia u President”, la ong u Bah Samlin.


“Hadien ba la iehnoh kam u bah Ardent M Basaïawmoit ka Party ka don ia u President.  Hynrei hadien ba la dep shim smai kum u Myntri ka la don ka jingiakren tang da ka ktien na ka liang u bah Renikton uba la ong ban ailad lang ban ioh bynta kum u Myntri Sorkar”, la ong u Bah Samlin.


“Ka Party ka la jop tang ar ngut ki MLA bad baroh ar ngut ngi la leit shwa sha u President barim ban pan jingmut ia ki sienjam bad na ka liang u bah Ardent, ha katei ka por u la ong ba dei ban leit beit bad ka UDP ha ka Regional Democratic Alliance (RDA)”, u la iathuh.


“Lada ba ka RDA ( ka kynhun ia treilang ka HSPDP bad UDP) kan don ha ka Sorkar, u Bah Ardent u la ong ba ngan shimti ia ka ka Myntri namar ba nga la jop shwa ia ka elekshon MDC ha u snem 2016”, u la iathuh.


“Ka  kam ban ia kylliang Myntri kam dei satia kaba la wanrah da ka party naduh ba sdang bad mynta ruh ngam sngew eiei lada ka party ka tuklar bad nga ieh ha ka jingstad ka Party ban shim ia ka rai”, u la ong.


“Ha ka por ba u President ba mynta, Bah K P Pangniang nga la leit ban ia kynduh halor katei ka mat bad kum u MLA ka Party nga la pynsngew ia ka nongrim jong nga bad nga pdiang sngewbha ia ka jingpynbeit ka Party da ka lynti kaba dei”, u la ong.


Ha kawei pat ka liang, u la ong ba u la dep rai lypa bad pan por na ka Party ban pyndep shwa ia ki kam ba sahkut jong ki tnad treikam kiba u bat kum u Myntri. “U Bah Renikton lada u dei u briew uba don ia ka nongrim u dei ban sngewthuh  ia ka jingpan por jong nga”, u la ong.