Ka SMB kan nym lum bai khajna na ki nongrep bad nongkhaii mar rep: Hamlet

Shillong, Nailar 05: U Myntri ka tnad Urban Affairs ka Sorkar Jylla, u Bah Hamletson Dohling u la pynpaw ba ym dei ban don kano kano ka jinglum khajna na ki nongrep ne nongkhaii mar rep ha ki Ïew shipor kiba la buh ban pynlong ha ki ar tylli ki Parking Lot -kawei ha Them Iewmawlong bad kawei ha pyrshah ka Anjali Galleria.

Ia kane u Bah Hamletson Dohling u la kren ha ki nongthoh khubor ha ka janmiet sngi Balang hadien ka jingud ki nongrep bad nongkhaii mar rep kiba pyniaid iew ia ki mar rep ha Parking Lot ha pyrshah ka Anjali Galleria kaba la mih ruh ha ki lad pathai khubor ha ka sngi Balang mynstep.

“Hadien ka jingioh jingtip ba ka la don ka jingkhrong pisa na ka liang ka Municipal na ki nongrep ne nongkhaii mar rep kaba 10 long tyngka shi kriah lane shi byrni ia ki mar jong ki nongrep, na ka liang jong nga hi nga sngewlyngngoh”, u la ong.

“Hadien ba la khang ia ka Ïewduh na ka daw ka jingpang COVID-19, e na ka liang jong nga bad u Myntri ka tnad Agriculture , u Bah Banteidor Lyngdoh ngi la ia kren kumno ban iarap ia ki nongrep bad nongkhaii mar rep jong ngi…ngi la rai ban ai ar tylli ki Parking Lot ban pynlong iew”, u la ong.

“Ngi leh ia kane namar ngi don ka jingsngew khia na ka bynta ki nongrep namar ba ki nongrep ynda la dep kheit ia u mar rep lada kim ïoh jaka die te shaei kin leit. Hynrei ha kaba ia dei ba ka tnad Municipal ka shim ia ka bai lum khajna 10 tyngka shi kriah ne 10 tyngka shi byrni ka long kaba la pynkyndit ia nga bad ia kane la leh tang da ka ophis Shillong Municipal Board”, u la iathuh.

“Mar mar tang shu ïoh jingtip nga la khot ia ki ophisar ka tnad bad nga la ong ba dei ban pynsangeh mar dor bad yn ym lah ban shim kano kano ka khajna la ka long kumno kumno ruh namar kane ka dei ka por kaba eh bha na ka bynta ki paidbah nongrep”, u la ong.

Haba kylli, Myntri u la ong ba ia mynta ka la don ka jingduh lypa na ka jingioh lum pisa ka tnad hynrei ym lei lei ia kata. “Hynrei ka tnad kan shim jingkitkhlieh ban pynkhuid bad nga la bthah ia ka SMB kan shim ia ka bynta ba ki ophisar kin ia kynduh ia ki nongkhaii, ki nongrep ban ia mir jingmut kumno ban pynmih ia ka bai pynkhuid”.

“Namar lada ka long kumno kumno ruh ka dei ka kamram jong ka tnad pat ban pynkhuid hynrei ka shong pat ha ki nongkhaii bad ki nongrep kiba pynlong iew ba kin ia pyrkhat bad kam dei ba ngi buh kano kano ka kyndon ba dei beit ban lum khajna na ki. Lada ki sngew ba dei ban noh synniang ruh ai kin rai da ka jingialang ia mir jingmut ia kaba la dep ong ia ki ophisar”, u la pynkut.