Ka sorkar jylla kam kwah shuh ban ïohi ba ki kam lehnoh kin dang bteng hadien ka jingwan pyndem ki dkhot ka GNLA: James

  • Shillongmail
  • March 12, 2018
  • Comments Off on Ka sorkar jylla kam kwah shuh ban ïohi ba ki kam lehnoh kin dang bteng hadien ka jingwan pyndem ki dkhot ka GNLA: James

Shillong, Lber 12: Ka jingthrang ban nym iohi shuh ia ki kam pyntriem da ki kynhun kieng atiar ka dei kaba ki paidbah ki khmih lynti ha ki sngi ban dang wan ha ka jylla Meghalaya khamtam hadien ka jingwan pyndem ki katto katne ki dkhot kiba khatduh ka Garo National Liberation Army (GNLA) ha ka Lah Sngi u Blei kaba long ruh jan dap khyndai snem ka jingiakhih bad ki kam ia um-snam jong ka.

Hynrei na ka liang ki bor sorkar ki shim khia ba ioh lehse kan don da kawei pat ka jingthmu kumba ka jia da ka jingiateh kular ka Tripartite Agreement bad ka kynhun kieng atiar kaba la duh noh mynta ka A’chik National Volunteers’ Council (ANVC) ha u snem 2004 ha kaba ka la don ka jingpyrshang ban pynjah ia ki kam pyntriem da ki lehnoh haduh ba ka GNLA ka la wan mih sha khmat ha u snem 2009.

Hadien ka GNLA, shi bun tylli ki kynhun kieng atiar ki la mih na Ri Lum Garo. Hynrei pynban ka dei bad ka sorkar kaba la dep ha ka jingialam u Dr Mukul Sangma kum u Myntri Rangbah ha kaba ia ki kynhun lehnoh la shim bad leh tyngeh bad bun ki la wan ban pyndem lyngba ki nongialam niam bad ki kynhun trei mon-sngewbha.

Phra ngut ki dkhot kiba dang ha ka rta kaba 18 tam bad kiba ha ka rta 20-30 snem, ki la wan ban pyndem ryngkat ki tiar pyn-mynsaw ha khmat u Myntri kam poh-ing ka sorkar jylla u James K Sangma ha Police Headquarters hynne ka nohphai sngi. Na ka liang ki pulit bad ki dkhot ba la wan pyndem, ki la kam ba kine ki phra ngut ki dei kiba sah khatduh kum ki dkhot ka GNLA.

Kine ki kynthup ia u Baringstone S. Sangma na Resubelpara, Hendison M. Sangma, Thangkham Ch. Momin, Kiubirth S. Sangma, Rahul S. Sangma bad u Timbil Ch. Marak kiba dei na Williamnagar, Chonbirth Ch. Marak na Baghmara bad u Sujit G. Momin na Jogisil, West Khasi Hills. Kine ki dkhot ki la wan pyndem ryngkat ki tiar iakhun kum ki AK – 56 rifle, INSAS Rifle, Glock-19, .303 Rifle Nalor ki kuli bad ki tiar pynbthei.

Kane ka jingwan pyndem ka la jia tang katto katne taiew hadien ka jingshah siat iap u ‘Commander In Chief’ ka GNLA u (L) Sohan D Shira ha ka 24 tarik u Rymphang, 2018. U nongialam ba ha khmat mynta ka GNLA, u ba dei ruh u dkhot ia ULFA (I) u Dhristi Rajkhowa, ia u ba ki pulit ka jylla ki beh thong, la ioh jingtip ba u la phet na ki bynta ka West Khasi Hills District katto katne sngi hadien ka jingshah pyniap u Sohan.

Haba pdiang burom ia ki dkhot kiba la wan ban pyndem, u Myntri kam poh-ing ka jylla u la pynpaw da kaba Shai ba kan ym don jingiakren eiei bad kino kino ki kynhun kiba don kti ha ki kam pyntriem bad ki kam ia um-snam. U la ong ba ka sorkar ka kwah ba ka Meghalaya kan dei kaba lait na ka jingdon ki kynhun lehnoh bad kaba lait na ki kam sniew.

U James K Sangma u la ong ba kane ka jingwan pyndem kan wanrah jingsuk ha Garo Hills, West Khasi Hills bad South West Khasi Hills District.

Da kaba ai ka jingiaroh ia ki bor pulit ka jylla bad sorkar pdeng, u James K Sangma u la ai ka jingiaroh ia ki paidbah kiba pyrshah ia ki kam lehnoh. U la ai ka jingkhublei ia ki nongialam niam kiba la trei shitom bad kumjuh ia ki nongialam jong ki kynhun trei mon sngewbha.

Da ka jingkhmih lynti ba ki kam ban pynjah noh ia ki kynhun lehnoh kieng atiar, u James K Sangma u la ong, “Ngi donkam mynta ba peit bniah da ki bor pulit ban iakhun ia ki kam sniew kiba long pyrshah ia ki kynthei khynnah bad kiba long pyrshah ia ka hok long briew man briew. Ngin pynkhlain bor ia ki pulit ha kaba ia dei bad ki jingstad bad kiwei pat ki tiar ki tar kiba ia dei bad kane ka juk mynta “.