Ka sorkar kan nym pat pynduna ïa ka dor bai petrol bad diesel: MR

Shillong, Naitung 19: Ka jingwan ka khlam COVID ha ka jylla ka la ktah haduh katta katta ïa ka pla tyngka jong ka Meghalaya bad dei na kane ka daw ba ka sorkar jylla ka la rai ban ym pat pynhiar ia ka khajna ha ka petrol bad diesel ia mynta hi.

Haba kren bad u Myntri Rangbah ka Jylla, Conrad K Sangma u la ong ba ha ka por ba dang sdang ka khlam COVID ka dor jong ka umphniang ka la hiar bad na ka liang ka sorkar ka la rai ban kyntiew noh ia ka khajna da 3 tyngka na ka bynta ban pynkiew shuh shuh ia ka jinglum khajna na bynta ka jylla.

Hynrei hadien ba ka dor umphniang ka la kiew stet salonsar, kumta ka dor petrol bad diesel ka la kiew lang. “Haoid, ka la kham heh khyndiat hynrei to ngin ap shwa shipor bad lehse ka dor umphniang ha ka pyrthei kan sa hiar biang,” u la bynrap biang.

Nalorkata, u ong ruh ba da kaba buh hakhmat ia ka jingtyrkhong  pisa ba ka sorkar jylla ka kynduh mynta, ia mynta hi kin ym pat lah ban pynhiar ia ka dor jong ka petrol bad ka diesel.

U Myntri Rangbah u la pyntip ruh ba katei ka khlam ka la ktah jur bha ia ka ioh ka kot ym tang ha ka jylla hynrei ha ka ri baroh kawei.

La iathuh ruh ba ha ka jinglum khajna kaba nyngkong ka jingioh lum ha u bnai ba Nyngkong jong ka jingkhang dam ka long tang 2 lak tyngka.

“Hynrei haba lum lang baroh pat, ka jingioh ka la nang kiew tangba kam kot pat kumba la khmih lynti, hynrei ka poi tang kumba 40 persen eiei,” u la ong.

Shuh shuh u la ong ruh ba ka jinglum na ka GST ka la shah ktah haduh kumba 40 – 50 persen hynrei u ong pat ba ka khajna ba ka jylla ka ioh ka la sdang ban mih hadien ba la ailad ban sdang ia ka khaii pateng ha ka jylla.

Ha kajuh ka por u la pynkynmaw ba ha ka por ba mar ia sdang ka jingkhang dam ka la don ka jingsyier kaba khraw na ki nongrep kumjuh ki kontraktor bad nongbylla sngi.

Hynrei u la ong pat ba mynta ba ka khaìi pateng  ka la iaid biang ka sorkar ka la iohi ba ka jinglong jingman ka la sdang wanphai biang. Katkum ka jingong jong u, ka jingioh lum khajna  kan sa kiew biang ha kine ki khyndiat bnai ban wan.