Ka sorkar Nagaland kan nym ïoh jaka ha pyrshah ka NEIGRIHMS: Hamlet

Shillong, Nailar 26: U Myntri ka tnad Urban Affairs ka Sorkar Jylla Meghalaya, Bah Hamletson Dohling u la kren shai ba ka jaka ba 2 acre tam kaba ha pyrshah ka NEIGRIHMS ym dei ban ai sha ka Sorkar Jylla Nagaland bad dei ban ai bujli noh da kawei pat.

Kum ban shu kdew ba ka Sorkar Jylla barim ha u snem 2013 ka la ia kren bad ka Sorkar Nagaland ban aiti ia katei ka jaka bad la aiti ia katei ka jaka ha u snem 2016 ha kaba ka Sorkar Jylla Nagaland ka la siew 2 klur san lak tyngka kum ka Premium Fees sha ka tnad Urban ka Sorkar Jylla Meghalaya.

Ka tnad Urban Affairs ka Sorkar Jylla Meghalaya ka la pynpaw ba kan tyrwa noh da kawei ka jaka sha ka Sorkar Jylla Nagaland kaba don ha pyrshah ka North Eastern Institute of Ayurveda and Homoeopathy (NEIAH) ha Mawdiangdiang.

U Bah Hamletson Dohling hadien ka jingwan jurip ia kitei ki jaka baroh ar tylli u la ong, “Ngam sngew iahap ba ka jaka kaba paka bad long yn ai sha kiwei katba ialade pat yn shim da kiba kham sha kyndong. Ngam sngew iahap ia kane ka kam”.

“Ki la mut ban wan plie mawnongrim ban shna projek ne building ne Medical Centre (ia kaba ngam tip ki mut aiu) bad la wan kynduh u Myntri Urban Affairs ka Sorkar Jylla Nagaland ia nga bad nga la hap ban pynsangeh”, u la iathuh.

“Ka jingmut ka Sorkar Jylla Nagaland ka long ban thaw jaka sah ba ki briew na katei ka Jylla kin wan sah ha katei ka jaka haba wan sumar ha NEIGRIHMS”, u la ong.

“Nga pyrkhat ba ka tnad Urban Affairs kan shna ki kynja Ïing sah ha kane ka jaka ba ki paidbah nongshong shnong na ka thaiñ nongkyndong kin lah ban pyndonkam haba wan sah bad phah sumar shane sha NEIGRIHMS”, u la ong.

Haba kylli, u la ong, “Ka don ka jingiateh (Agreement) ha u 2016 ba ka Sorkar Jylla Nagaland ka dei ban pyndonkam ia kane jaka hapoh san snem bad lada ym pyndonkam hap pynphai biang sha ka tnad Urban Affairs”.

Ia u Bah Hamletson Dohling la synran lang da ki ophisar ka tnad Urban Affairs ha kane ka jingleit jurip ia kitei ki jaka.