Kem ki pulit ïa 8 ngut ki nongkhaïi kynthei na WJH, ïoh pyllait pat ïa 9 ngut ki khynnah kiba hapoh 14-16 snem

Jowai/Shillong, Jylliew 4: Ki Pulit jong ka West Jaiñtia Hills ha kine ki khyndiat sngi ki la pynlong ïa ka jingpynap shrip ban lap ïa ki runar kiba donkti ban khaïi kynthei bad kane ka jingtrei shitom jongki ka la long kaba seisoh hadien ka jingïohkem ïa kiba donkti kata hapoh ka sor Jowai.

Ka khubor kaba ïoh lum na ki pulit, la ïathuh ba kine ki briew kiba donkti ban khaïi ïa ki kynthei kiba dei tang ki khynnah rit kata hapoh ka rta kaba 14 haduh 16 snem kidei kiba na ki shnong bapher bapher kiba don hapoh ka sor Jowai, West Jaiñtia Hills.

Haryngkat ka jingïoh ban kem ïa kine ki nongleh kam sniew kiba don haduh phra ngut kaba kynthup ïa u dalal uba dei uba la pynïaid ïew ïa kane ka kam, ki pulit ki la ïoh ruh ban pyllait noh pat ïa kita ki kynthei kiba la shah khaïi hapoh katei ka kam kiba don haduh khyndai ngut.

Katkum ka jingïathuh jong u SP ka West Jaiñtia Hills, u bah Lakador Syiem, kine ki khyndai ngut ki kynthei la ïoh ban pyllait na artylli ki jaka, san ngut na Mihmyntdu ha ka sngi Nyngkong bad ha ka sngi Baar la ïoh ban pyllait pat 4 ngut na kiwei ki jaka.

U la ïathuh ruh ba ki phra ngut kiba shah kem kidei kiba la ithuh kyrteng kum ka Dapynbiang Sten (26) na Kyrwen, ka Riwandakaru Dann (22) na Ladthadlaboh, ka Kristina Lyngdoh (18) na Sohkynphor, ka Sanwaki Dkhar (28) na Khliehiongriang, u Lemi Ryngkhlem (20), u Elison Dkhar (24), Emryngkatmitre Dkhar 20 bad u Prosperity Talang (22) na Demthring.

Katkum ka jingïathuh u heh pulit ka distrik, na kine ki phra ngut kiba la shah kem, ki don kiba dei ki suba dalal kiba ïit kynthei bad kiwei pat kidei kiba ïit ïa ki nongleh kam awria kiba ju siew sha ki ha ka dor.

Na ka liang u SP u la ong, kane ka jinglah ban kem bad ban pyllait ïa kitei ki khynnah kynthei kadei ka jingtrei shitom ki Pulit Kynthei hapoh ka jingïalam ka Officer Incharge ka SI I Kharpran bad ka Special Juvenile Unit, ka Child Line, ka Child Welfare Committee, District Social Welfare Officer bad ka ANTF.

Haba kylli kumno ki la ïoh lum jingtip ba ka don kum kata ka kam hapoh ka sor Jowai, u SP ula ong, kaba la pynlong ïa ki ban tih bniah kadei hadien ba jah rngai kawei ka khynnah naduh 25 u Jymmang na kawei ka Shnong kaba don ha Jowai.

Nalorkata, u bah Lakador u la ong ba dei hadien ka jingtohkit bniah bad ban ïoh ruh ban kynduh ïa ki paralok jong ka khynnah kaba la jah, la lap ksai ba ka don ka kam khaïi kynthei.

Hadien ba la ïoh ban kem bad ban tohkit, kine ki 8 ngut ki la shah pynngat ha ki kyndon ain POCSO, IPC, Immoral Traffic (Prevention) Act 1956 bad kiwei bad la rah ïa kine ki 8 ngut sha ïing bishar ban tian bishar ia ki.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589