KHADC Ilekshon: Shah kynnoh ba sam pisa ki nongkitkam ka NPP ïa ki paidbah ha Wahiingdoh

Shillong, Rymphang 27: Ka ilekshon sha ka KHADC-JHADC ka long kaba jai jai watla ki la don ki jingjia jong ki jingïashoh bad ban ïa pynmynsaw hynrei ha ki khyndiat por shuwa ba ki paidbah kin leit thep vote, ki lamih bun ki jingkynnoh ha kaba ïadei bad ki kam sam pisa bad kiwei.

Ha kawei na ki jingjia, kadei kaba la jia ha Wahïingdoh ha ka miet jong ka sngi Baar kaba ki dkhot ka Khun Hynñiewtrep National Awakening Movement (KHNAM) Wahïingdoh ki la ïoh ban bat ïa ar ngut ki briew kiba dei na ka seng National People’s Party (NPP) kaba ki suba ba ki wan ban sam pisa sha ki paidbah ka Wahïingdoh na ka bynta ka ilekshon MDC.

Ka Wahïingdoh kadei ka shnong kaba hap hapoh ka Mawkhar-Pynthorumkhrah konstitwensi jong ka Khasi Hills Autonomous District Council (KHADC).

Na ka liang, u kyrtong ka KHNAM u bah Glenbert Khongwir u la ïathuh, ba ki dkhot ka KHNAM Wahïingdoh ki la ïoh ban bat ar ngut ki briew kiba dei jong ka seng NPP katba ar ngut pat ki la ïoh phet noh. 

“Ka long kaei kaei kaba sngew khia ban ïohi pylleiñ pylleiñ ba ki briew ki mut thied ïa ki vote da ka pisa bad kaba long pyrshah ïa ka rukom bad ka aiñ pynïaid ilekshon”, la ong u Bah Glenbert.

U bah Glenbert u la ong, na kitei ki arngut ki briew, ki nongkitkam ka KHNAM ki la ïoh kurup ïa ki jingthoh bad ki jingkheiñ jingdiah kiba pynpaw ba ki don ki jingsiew pisa sha ki paidbah.

U la ïathuh ruh ba ïa kine ki briew kiba la ïoh kem la aiti noh sha ki pulit.

Kum ban shu kdew ba kane ka la jia katto katne kynta shwa ba ki paidbah kin leit thep ïa ki vote na ka bynta ka ilekshon MDC jong ka KHADC.

U kyrtong ka NPP na katei ka konstitwensi u dei u Bah Pynshngain N Syiem bad haba ïakren bad u nongthoh khubor, la ïathuh ba kitei ki kot kiba ïoh kurup kidei ki registar kiba la pynrung ban lum jingkheiñ na ka bynta ka jinglut jingsep kaba kynthup ïa ka bai sha, bai bam, ka bai kali bai umphniang, bai sngi jong ki volunteer bad kiwei kiwei.

“Kam shym don eiei ban ong ba kadei ka pisa ban thied ïa ki vote hynrei kumba ju long bad ba dei ban don ka jingkheiñ bad ka bai lut bai sep, kumta la leh khnang ban suk ban ai jingkheiñ,” ong u bah Pynshngaiñ.

Nalorkata, u la ong kane ka jingkynnoh kadei tang ban pharep bad ban pynthohbria ïa nga bad ïa ka seng NPP.

1 thought on “KHADC Ilekshon: Shah kynnoh ba sam pisa ki nongkitkam ka NPP ïa ki paidbah ha Wahiingdoh

Comments are closed.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589