Khang ka sorkar ban die ne ot sniang ha ki jaka ba ïap sniang

Poi 14 ngut kiba ïoh COVID mynta ka sngi

Shillong, Nailar 13: Ka sorkar jylla ha ka sngi Palei ka la shim ia ka rai ban khang ot ne doh sniang ha baroh kito ki jaka ba don ka jingiap sniang kum shi bynta ban khanglad ia ka jingphriang jong katei ka jingpang sniang.

Haba kren bad ki lad pathai khubor, u Symbud Myntri Rangbah u la iathuh ba tad haduh mynta ka sngi ki la don haduh 73 tylli ki sniang bad na kine 24 tylli la dep ban test bad ki paw ba ka jingiap jong kitei ki sniang kidei na ka jingpang African Swine Fever.

Dei halor katei ka nongrim ba ka sorkar ka la shim ia ka rai ban pynbna ba kito ki jaka ba don kiba iap sniang kin long noh kum ki containment zone ha kaba la mana ban ot ne die dohsniang.

“Ki la don haduh 12 tyli ki shnong ba don katei ka jingiap jong ki sniang kynthup ha East Khasi Hills, West Khasi Hills, Ri Bhoi bad West Jaiñtia Hills,” ong u Symbud Myntri Rangbah.

Ha kane kajuh ka sngi u Symbud Myntri Rangbah u la iathuh ba ka sorkar ka la aiti ha u Chief Secretary ban wad jaka na ka bynta ban buh ia ki nongdie madan khnang ba kan ym wanrah ka jingkhapngiah palat khamtam ha kum kane ka por ba don ka khlam COVID-19.

Shwa kane, u Myntri ka Koit ka Khiah ka jylla, Bah AL Hek u la iathuh ba ki don 14 ngut kiba ioh COVID ha kane ka sngi Palei kaba pynlong ia ka jylla mynta ban don haduh 640 ngut kiba pang COVID.

Tang na East Khasi Hills ki don 11 ngut kata lai ngut ki shipai bad 8 ngut ki paidbah. Iwei na kitei kiba ioh COVID mynta ka sngi na East Khasi Hills I dei ruh I nurse na NEIGRIHMS. Nangta ha North Garo 1 bad West Garo Hills arngut.

Kiba koit pat hynne ka sngi ki long 30 ngut kaba pynlong ia ka jylla ban don baroh 547 ngut kiba la koit.