Khlad kawei ka longkmie,136 kiba ïohkem pang, 104 ngut kiba koit na ka khlam Covid-19

Shillong, Risaw 25: Kawei ka longkmie ba Tripura ba tip kyrteng kum ka Manibala Debbarma 27snem na ka shnong Sayadachara, Kumarghat, North Tripura ka la khlad ha ka 23tarik ha NEIGRIHMS na ka daw u COVID -19 nalor kiwei ki jingpang ba ka don.

Hynrei namar ba la lap ha Shillong ba ka ioh ia utei u virus kumta la hap ban ñiew ha Meghalaya ia ka jingiap jong ka.

Katkum ka kyrwoh na u DHS, Dr. Aman Warr ha kane ka sngi ki la don haduh 136 ngut kiba ioh thymmai ia utei u khniang jingpang.

Na kitei ki 136 ngut haduh 76 ngut kidei na Ri Bhoi ba kynthup ia ki 59 ngut tang na NEPA Cluster. Na East Khasi Hills pat ki don 39 ngut, West Garo Hills 08 ngut, East Jaintia Hills 07 ngut, North Garo Hills 03 ngut, South Garo Hills, South West Garo Hills bad West Garo Hills mar iwei.

Kumba long mynta kiba dang pang ha ka jylla ki long sa 1605 ngut.

Ha kane ka sngi ki la don ruh haduh 104 ngut kiba la koit na kynthup ia ki 73 ngut na East Khasi Hills, 09 ngut na West Garo Hills, 08 ngut na East Jaintia Hills, 5 ngut na South Garo Hills, 2 ngut na East Garo Hills, North Garo Hills, West Jaintia Hills, West Khasi Hills bad 1 na Ri Bhoi.

Baroh kiba koit haduh mynta ka sngi ha ka jylla ki la poi haduh 7228 ngut.