Khlad sa uwei na ka khlam COVID-19, 101 kiba ïoh pang mynta ka sngi

Shillong, Nailur 29: Sa uwei pat u Rangbah u la khlad hynnin ka sngi na ka daw u COVID kaba pynlong ia ka jylla ban don haduh 47 ngut kiba iap.

Utei uba khlad udei uba tip kyrteng kum u Dil Bahadur Thapa 55 snem na Ladrymbai uba la khlad noh ha NEIGRIHMS ha ka 28tarik mynta u bnai ha ka por 6.46 baje mynstep.

Haba pyntip ia kane u Director ka tnad ka Koit ka Khiah Dr Aman War u la iathuh ruh ba ki don haduh 101 ngut kiba ioh thymmai ia utei u khniang jingpang kaba pynlong ia ka jylla mynta ban don 1476 ngut kiba pang.

Na kitei ki 101 ngut kiba dang ioh ia utei u virus 54 ngut kidei ha East Khasi Hills kata 5 ki shipai bad 49 ngut ki paidbah. Ha West Garo Hills pat ki don 37 ngut ba kynthup ia 12 ngut ki shipai bad 25 ki paidbah. Nangta ha West Jaintia Hills pat ki don 4 ngut, Ri Bhoi 2 ngut, South West Garo Hills 2ngut, East Jaintia 1 bad na East Garo Hills iwei.

Kumba long mynta ka Distrik kaba bun eh dei ka East Khasi Hills kaba don haduh 942 ngut kiba pang, nangta West Khasi Hills 8 ngut, South West Khasi Hills 3 ngut, Ri Bhoi 96 ngut, West Jaiñtia Hills 12ngut, East Jaintia Hills 213 ngut, West Garo Hills 154, South West Garo Hills 30 ngut, South Garo Hills 2 ngut, East Garo Hills 10 ngut bad North Garo Hills 23 ngut.

Ha kane ka sngi kia don ruh haduh 72 ngut kiba koit na u COVID. kine ki kynthup ia ki 54 ngut na East Khasi Hills, West Garo Hills 9 ngut, East Jaintia Hills 4 ngut, East Garo Hills 3 ngut bad Ri Bhoi 2 ngut.

Baroh lada kheñ kyllum lang kiba koit na u COVID ki long 3940 ngut.