Khlad sa uwei u rangbah na ka khlam COVID-19, kiew ka jingiap sha ka 77 ngut

Shillong, Risaw 21: Sa uwei pat u rangbah u khlad hynne ka sngi na ka daw jong u COVID nalor kiwei kiwei ki jait jingpang kiba u don. Utei u rangbah u ba dei uba 77 ban khlad ha ka jylla na ka daw utei u virus nalor ki jingpang ba u la don lypa udei uba la tip kyrteng kum u Bah Wester Mawrie 57 snem na ka shnong Mawlynrei.

Ha kane ka juh ka sngi, la sakhi ruh ba ka jingdon kiba ioh thymmai ia utei u virus ka la hiar arsut namar ki don tang 28 ngut kiba ioh thymmai kaba pynlong artad ia ka jylla lada khein kyllum ban don mynta sa 1870 ngut ki briew kiba dang pang.

Kitei ki 28 ngut kiba ioh COVID hynne ka sngi ki kynthup ia ki 12 ngut na East Khasi Hills, 06 ngut na West Garo Hills, 05 ngut na West Jaintia Hills, East Garo Hills 02 ngut, South Garo Hills 02 ngut bad East Jaintia Hills iwei.

Ka jylla ka sakhi ruh ba ha kane ka sngi ki la don pat haduh 177 ngut ki briew kiba la koit na utei u virus, kitei ki kynthup ia ki 104 ngut na East Khasi Hills, kata shipai – 01, Bishnupur cluster- 01, Golflink cluster- 03, High Risk- 29, IGP cluster- 01, Jaiaw cluster- 06, Laban cluster- 04, Madanryting cluster- 03, Mawkhar cluster- 01, MawlaiNonglum cluster- 14, Nongmynsong cluster- 01, Oakland road cluster- 03, Police Bazar cluster- 01, Polo cluster – 01, PynumkhrahCluster- 24, Rilbong cluster- 09, Rynjah cluster- 02.

Na Ri Bhoi 43 ngut ba kynthup ia ki shipai 37 ngut, high risk – 04 ngut bad NEPA cluster 02 ngut.

Na West Garo Hills 14 ngut ba kynthup ia ki High Risk- 13, bad iwei ba dang wanphai na bar jylla. Na North Garo Hills pat 07 ngut bad baroh kitei ki dei ki high risk, na West Jaintia Hills ruh ki don 03 ngut bad baroh ki dei ki high risk.

Na South West Garo Hills 02 ngut, South West Khasi Hills – 02 ngut kiba dei ki high risk, West Khasi Hills ruh arngut ha kaba iwei dei i high risk bad uwei pat dei u pulit. Kumta, lada khein kyllum baroh ka jingdon ki briew kiba koit ka la kot sha ka 6674 ngut katba ka jingdon kiba iap pat ka neh beit da 77 ngut.