Khlad sa uwei u rangbah na u COVID, ïoh covid haduh 93 ngut mynta ka sngi

Shillong, Nailar 22 : Sa uwei pat u rangbah ba pang COVID -19 u ba la 58 snem ba tip kyrteng kum u R Rai na Jhalupara, Cantonment Area u la khlad noh ha ka miet 21tarik mynta u bnai ha Shillong Civil Hospital hadien katto katne sngi ba la pynkynriah noh na Woodland Hospital.

Haba pyntip ia kane, u Director ka tnad ka Koit ak KHiah, Dr. Aman Warr u la iathuh ba utei u nongpang udei uba don ka jingpang jynjar ban ring mynsiem, Diabetes, Hypertension nalor ba u ioh ia utei u virus.

Shuh shuh u la iathuh ruh ba ha kane ka sngi ki don 93 ngut ki briew kiba ïoh ïa u khñiang jingpang Coronavirus ha kane ka sngi Balang kynthup ïa ki 66 ngut tang na East Khasi Hills.

Katkum ka jingïathuh da u Director ka tnad ka Koit ka Khiah Dr. Aman War, tad haduh ka janmiet sngi Saitjain na ki 66 ngut kiba ioh ia utei u virus ha East Khasi Hills ki kynthup ia ki 21 ngut ki shipai bad 45 ngut ki riew paidbah.

Nangta, ka West Garo Hills – 09 ngut ba kynthup 04 – BSF bad 5 ngut ki paidbah, ha Ri Bhoi – 2 ngut ki riew paidbah, West Khasi Hills ruh 10 ngut ki riew paidbah, North Garo Hills – 02 ngut bad ha East Jaiñtia ruh 04 ngut kiba dei ki riew paidbah.

Kumba long haduh mynta, ka East Khasi Hills kadei kaba bun tam kiba ioh COVID da ki 662 ngut, kata BSF – 103 ngut, paidbah – 419 bad ki shipai pat 140 ngut. Nangta ka West Khasi Hills – 28 ngut, South West Khasi Hills – 01, Ri Bhoi – 93, West Jaintia – 3, East Jaintia – 12, West Garo Hills – 215, South West Garo Hills – 4 ngut, South Garo Hills – 2 ngut, East Garo Hills -12 ngut bad North Garo Hills – 12 ngut.

Ha kane ka sngi ki la don pat 20 ngut kiba koit, ba kynthup ia ki 15 ngut na West Garo Hills ba kynthup ia 12 ki BSF, bad 3 ngut ki riew paidbah, nangta ha Ri Bhoi – 1, West Jaintia – 1 bad East Khasi Hills 3 ngut.