Khlad u khynnah ba 15 snem na ka jingpang Covid-19, 168 ngut mynta ka sngi

Shillong, Nailur 12: Ka Meghalaya mynta ka la don haduh 25 ngut ki briew kiba iap na ka daw jong u COVID kiwei ki jingpang hadien ba uwei u heprit ba dang 15 snem u la khlad noh ha ka 10 tarik mynta u bnai ha Dr. H Gordon Robert Hospital ha ka por 5.30 bake mynstep.

Utei u heprit udei uba la tip kyrteng kum u Well done Boy Marbaniang na Mawpat. Kumba long mynta utei u heprit udei uba khynnah tam na ka jylla ban iap na ka daw jong u COVID. La iathuh ruh ba utei u heprit udei uba don ia ka jingshitom ban ring mynsiem. Bad dei hadien ba la test la lap ba u don ia utei u virus.

Ka jylla ha ka sngi Saitjaiñ ka la sakhi ba ki don haduh 168 ngut ki briew kiba ioh thymmai ia u khniang Corona virus kaba pynlong ia ka jylla mynta ban don haduh 1570 ngut.

Haba pynbna ia kane, u Director ka tnad ka Koit ka Khiah Dr. Aman War u la pyntip ba na kitei ki 168 ngut, 124 ngut kidei na East Khasi Hills, West Khasi Hills -1 , East Jaintia Hills – 7, Ri Bhoi – 14, Wèst Garo Hills -17 ngut bad South West Khasi Hills – 4 ngut, East Garo Hills – 1 bad West Garo Hills – 17 ngut.

Kumba long mynta ka Jylla ka don haduh 1570 ngut kiba ioh ia utei u virus ha kylleng ki distrik jong ka jylla.

Lah ban kdew hangne ba ka East Khasi Hills Hills kaba bun tam da ki 994 ngut, West Khasi Hills 14 ngut, Ri Bhoi -130 ngut, West Jaiñtia Hills – 13 ngut, East Jaintia Hills- 146 ngut , West Garo Hills – 211, South West Garo Hills -8 ngut, South Garo Hills – 20ngut, East Garo Hills- 17 ngut bad North Garo Hills – 12 ngut bad South West Khasi Hilĺs – 5 ngut.

Ha kajuh ka por u pyntip ba ki don haduh 131 ngut kiba koit hynne ka sngi kynthup ia ki 92 ngut na East Khasi Hills, Ri Bhoi – 8 ngut, West Khasi Hills – 21 ngut bad West Garo Hills 10 ngut.

Kumba long mynta kiba koit ki la don haduh 2020 ngut.