Khlem bit jingpang Covid-19 ki bahaïing hasem na ki arngut ki myntri sorkar

Shillong, Naiwieng 01 : Ka tnad ka koit ka khiah jong ka jylla ka la lap ba ym don satia iwei ruh i high risk jong baroh arngut ki myntri sorkar ka jylla kiba ia bit ia u khniang jingpang COVID-19.

Haba pyntip ia kane, u Director ka tnad ka Koit ka Khiah ka jylla, Dr. Aman War u la ong ba ha ka jingbuddien ia baroh ki briew kiba kynduh ia kitei ki arngut ki Myntri kynthup naduh ki myntri haduh ki ophisar kumjuh ki bahaiing la lap ba ym don satia iwei ruh ban ia bit ia utei u khniang jingpang.

“Hadien ba la set slung bad test ia ki ym don satia iwei ruh ban ia bit ia utei u khniang jingpang,” ong u DHS.

Ha kajuh ka por, ka jylla ha ka sngi Nyngkong ka la sakhi ba ki don haduh 117 ngut ki briew kiba la koit na u COVID-19 katba kiba dang ioh thymmai pat ia utei u khniang jingpang ha kane ka sngi ki long tang 71 ngut.

Kitei ki 117 ngut kiba koit hynne ka sngi ki kynthup ia 83 ngut na East Khasi Hills, 14 ngut na Ri Bhoi, 8 ngut na South Garo Hills, 5 ngut na West Garo Hills bad West Jaintia Hills, bad mar iwei na East Jaintia Hills bad North Garo Hills. Haduh mynta ka sngi ka jingdon kiba koit ka la poi sha ka 8579 ngut.

Ha kajuh ka por kiba dang ia bit thymmai ia utei u virus hynne ka sngi pat ki kynthup ia ki 36 ngut na West Jaintia Hills, 29 ngut na East Khasi Hills, 2 ngut na Ri Bhoi, 2 ngut na West Garo Hills, bad mar iwei na East Garo Hills bad North Garo Hills. Ka jingdon ki briew kiba dang shah sumar ha kylleng ki bynta jong ka jylla mynta ka la hiar mynta sha ka 1009 ngut. La sakhi ruh ba hynne ka sngi ym don satia kiba iap na ka daw jong u COVID bad na kiwei kiwei ki jingpang.