Ki balang ne ki kynhun ñiam kin hap ban bud pyrkhing ïa ki kyndon ba bthah ka sorkar

Shillong, Nailur 30: Ka tnad ka koit ka khiah jong ka sorkar jylla ka la bthah ia ki Medical Health Officer kiba don ha kylleng ki jaka sumar ba kin leit ban ai jinghikai lane ban pynshai niah ha ki nongialam niam ia ki kyndon kiba donkam ban bud pyrkhing ha shwa ban rung sha ki iing mane.


Katkum ka jingiathuh da u Myntri ka Koit ka Khiah, Bah AL Hek, ki doktor bad kumjuh ki nongtrei ka Koit ka Khiah kin ai jinghikai naduh ka rukom kumno ban pyndonkam ia ka thermal scanner kaba ju pyndonkam ban thew ia ka jingshit jong ki paidbah kiba wan sha ki iingmane.


Na ka liang u Myntri u la ong ruh ba ki kwah ba ki paidbah kin bud pyrkhing ia kitei ki kyndon kynthup naduh kaba deng ia ki jingda khmat, ka jingpyndonkam ia ki dawai sait kti, nangta ka jingshong jngai iwei na iwei pat bad ruh ka jingkiar na kaba ieng ha ki jaka paidbah ha shwa ban rung bad hadien ba la mih na ki iing mane.


Lah ban kdew hangne, ba ki kynhun Balang bapher bapher ki la bunkam na ka bynta ban pynbiang lut ia ki jingdonkam kiba iadei bad ka jingbthah jong ka sorkar ha ki jaka mane blei khnang ba kin long katkum ki kyndon ba la buh ha shwa ba yn plie noh pat ia ki naduh ka 01tarik u Risaw.