Ki BSF kin nym ïoh shuh ban wanrung sha Meghalaya: Conrad Sangma

Shillong, Naitung 19: Ka daw kaba pynlong ïa ka Meghalaya ban kiew ha ka jingdon kiba ïoh pang COVID kadei eh na ka jingpur ha ktem ki shipai BSF bad kawei ruh na ki briew kiba wanphai na shabar jylla kynthup na Khanapara namar ka don ha syndah jong ka Guwahati, ong u Myntri Rangbah ka Jylla u Conrad K Sangma.

Haba kren bad katto katne ki lad pathai khubor, u Myntri Rangbah u la ong ruh ba ha kiwei ki bynta ka jingdon kiba ioh positive ka la nang hiar.

 “Ngi khmih lynti ba kan ym don shuh ka jingkiew ha ka jingdon kiba ioh thymmai ia utei u virus naduh ka taiew ban wan namar kan ym don shuh ka jingwan ki briew na bar jylla hadien ba ngi la khanglut ia ki khyrdop rung,” la bynrap shuh u Myntri Rangbah.

Shuh shuh haba iadei pat bad ka jingnang bun ki BSF ba ioh COVID, u Myntri Rangbah u la ong, “Ngi la bthah ia ki BSF ba kin ym ailad shuh ia ki shipai ba kin wanrung ia mynta. Kumta wat na ka ktem jong ki ruh ngi khmih lynti ba kan ym don shuh ka jingkiew ha kine ki shi taiew ne 10 sngi.”

Nalorkata, u Myntri Rangbah u la ong ruh ba ki khmih lynti ba ha kine ki khyndiat sngi ban wan kin don bun ki nongpang kiban sa koit noh namar bun na ki ki la jan dep ia ka jingset slung ba 14 bad 28 sngi. “Hynrei la katta ruh ngim dei pat ban kheinsting katba ngim pat lah ban lait pura na une u virus,” bynrap biang u Conrad.