Ki dorbar shnong kim lah shuh ban pyrkhing ïaki paidbah: Tynsong

Shillong, Nailar 24: Ka sorkar jylla ha ka sngi Nyngkong ka la kyntu ia ki nongialam shnong ba kim dei shuh ban pyrkhing ban phah set slung ia ki paidbah kiba rung ba mih na shnong ban leit donkam kylleng ki bynta jong ka jylla.

Haba kren bad ki lad pathai khubor, u Symbud Myntri Rangbah ka Jylla, Bah Prestone Tynsong u la ong ba khnang ba kan ym don shuh ka jingpyrkhing ia ki paidbah, ka sorkar jylla ka kyntu jur ia ki bor pyniaid shnong khamtam ia ki COVID Management Committee ban peitngor lang halor katei ka bynta.

Katkum ka jingong jong u, katei ka jingmaham na ka sorkar ka mih kadei hadien ba ki la ioh jingtip ba ki don bun ki dorbar shnong kiba buh kyndon ia ki nongshong shnong ba ki dei ban set slung kiba mih ban leit jingleit na kawei ka jaka sha kawei pat.

Kumta, halor kane, u Symbud Myntri Rangbah u ong ba ki da kyntu jur ia ki nongpyniaid shnong ba kin pyntikna ba kum kitei ki jingpyrkhing ia ka iaid ka ieng jong ki paidbah kam dei shuh ban don nangne shakhmat.

Ha kajuh ka por, u Symbud Myntri Rangbah u la ong ruh ba ka sorkar jylla ka la rai ban pyntreikam beit ia ki kyndon ban pyrkhing ia ka rung ka mih jong ki paidbah ha ki khyrdop rung khyrdop mih kiba don ha ki bynta bapher bapher jong ka jylla wat hadien ba ka sorkar pdeng lyngba ka tnad Kampohiing ka la pynmih ia ka jingpynbna ba kam dei shuh ban don ka jingpyrkhing ia ka leit ka wan na kawei ka jylla sha kawei pat.

Da kaba batai bniah halor katei ka rai jongka sorkar ban bteng pyrkhing ia ki khyrdop rung, u Bah Prestone u la ong ba kumba la rai, kin pyntreikam beit ban khang ia ki khyrdop baroh ha ka taiew ba nyngkong jong man u bnai tad haduh u Naiwieng mynta u snem khnang ban ailad ia ki nongtrei kiba don ha kitei ki khyrdop ban ioh shongthait bad ha kajuh ka por ruh ban ioh pynkhuid ia kitei ki jaka treikam.