Kiar shuwa ban wan sha Meghalaya: Prestone

Shillong, Jylliew 24: Namar ka jingiai kiew ka jingdon kiba ioh ia u COVID -19 ha ka ri baroh kawei, kynthup ka Assam kaba don ha ka jylla ba marjan, na ka liang ka sorkar Meghalaya ha ka sngi Balang ka la kyntu ia ki paidbah na kiwei pat ki jylla ba kin kiar shwa ban wan sha Meghalaya katba ka iaid ka ieng hapdeng ki jylla ka dang khang.

Nalorkata, ka sorkar ka la rai ruh ban pynkhlaiñ arshah ia ki khyrdop kiba don ha kylleng ki bynta jong ka jylla.

Da kaba kdew ia kaei kaba jia ha Assam kaba nang kiew ha ka jingdon kiba ioh ia utei u virus, na ka liang u Symbud Myntri Rangbah Bah Prestone Tynsong u la ong, “Ban khanglad ia ka jingpur jong utei u khñiang jingpang sha Meghalaya, ka sorkar ka la rai ban kyntu ia ki paidbah ban kiar na kaba wan rung shapoh ka jylla katba dang khang ia ka leit ka wan hapdeng ki jylla.”

Katkum ka jingong jong u, bun kiba kwah ban rung sha Meghalaya lehse na ka daw ba ka jylla ka duna kiba ioh ia utei u virus. “Hynrei ngi kyrpad ia ki paidbah ba kin kiar katba lah ia mynta hi ban wan kum ki nongjngohbkai pyrthei, kiba haiing lane kum ki paralok ha kum kane ka por.”

Ha kajuh ka por u la iathuh ba la bthah ruh ia u Chief Secretary ka jylla, u MS Rao ban pynkhlaiñ shuh shuh ia ki khyrdop rung bad mih kiba don ha ka jylla.