Kiba leit leh eksam NEET bad JEE kim donkam ban shah test COVID-19

Shillong, Nailur 3: Ka sorkar jylla ha ka sngi Palei ka la pyntip ba kito ki samla ka jylla kiba donkam ban leit thoh ia ka eksam National Eligibility cum Entrance Test ha USTM Khanapara ki lah ban pyndonkam da ki Admit Card ha ka por ba ki leit bad kumjuh ynda la wanphai.

Haba kren sha ki lad pathai khubor, u Myntri ka tnad ka Koit ka Khiah ka jylla, Bah AL Hek u la ong ba kito ki samla kim donkam satia ban da khuslai ia ka leit ka wan ha lynti namar na ka liang ka sorkar ka la rai ba kim donkam satia ban da aplai ne ioh ia ki Entry ne Exit Pass.

“Kim donkam ban applai ia ka Pass lane ban Test kynthup ia kiba haiing kumjuh ia u nongñiah jong ka kali namar ka dei tang ha ka jylla hi,” bynrap biang u Myntri.

Ha kajuh ka por u Myntri u la ong ruh ba ka jingpynjynsur ia ki kyndon na ka bynta kitei ki samla kadei namar ki kwah ba kin ioh ban py khreh kylluid na ka bynta katei ka eksam khlem da khuslai ia ka leit ka wan ha kum kane ka por ba ka jylla ka pyrkhing bha na ka daw ka jingphriang jong u COVID – 19.