‘Kiba pynpaw kyrteng ïalade, ki ïada lang ïa kiwei ruh’

Shillong, Naitung 26: U Bah AL Hek, Myntri Sorkar ba dei peit ia ka tnad ka Koit ka Khiah u la kyntu ia kiwei pat ki Myntri Sorkar bad ki MLA ban ia mih lang sha khmat ha ka ban leit jngoh bad ai mynsiem ia ki paidbah nongshong shnong khamtam ki jaka ne ki shnong ba don kiba la ngat ha ka COVID-19.

Kumba long mynta ha ki lad pathai khubor bapher bapher la ïohi tang ia u Myntri ka Koit ka Khiah bad ia u Dr Aman Warr, DHS (MI) kiba leit ai mynsiem ia ki nongshong shnong na kawei ka jaka sha kawei pat khlem da kheiñ ia ki jaka ba don ki nongshong shnong kiba ïoh COVID-19 la ka long ha ka Constituency jong u ne ha kiwei pat.

“Kum Myntri ka tnad ka Koit ka Khiah ka dawa palat ka kam ha kum kane por ka jingeh bad da ka jingkit khlieh na ka bynta ka koit ka khiah ki nongshong shnong hi baroh kawei ka Jylla ngam lah shah ban ïohi ba kan don ka jingeh ka pang ka shitom”, u la ong.

“Haduh mynta hi ma nga bad I Dr Aman Warr, DHS (MI) bad hateng ki don ki doctor kiba leit lang hynrei ma ngi pat man ka sngi ngi leit shi jaka ar jaka kiba la don ia ki nongshong shnong kiba ioh pang COVID-19. Ngi leit ban ai mynsiem bad jurip bniah ban shim ia ki sienjam kumno ban leh ban iada ia ka jingpang”, u la ong.

Da kaba ai khublei ia ki bor pyniaid shnong, ki nongtrei ka tnad ka Koit ka Khiah bad baroh kiba ia don bynta, u la ong, “Nga kyntu lang ia ki para MLA bad ia ki Myntri Sorkar kumjuh ba kin ia mih lang ba ki paidbah bad ki nongshong shnong kin shngaiñ kin ïoh mynsiem. Nga ai khublei ia I Dr Aman Warr iba ju leit ban ia synran bad nga man la sngi”.

Ha kawei pat ka bynta, u Myntri u la pynpaw ka jingiaroh ia ki samla, ki riewrangbah ne ki longkmie kiba pynpaw hi ba ki don ia ka jingpang COVID-19. “Ka kyndon ka Koit ka Khiah kam shah ban iathuh ia ki kyrteng ki nongpang”, la ong u Bah Hek.

“Ka jingpynpaw kyrteng ka iada ia bun ngut ki paidbah nongshong shnong bad kiwei kiwei ruh kin lah ban kiar bad pynsuk ruh ia ki nongtrei ka tnad ka Koit ka Khiah ban leh ia ka Contact Tracing. Ka dei ka jingai jingïatreilang jong ki kum ki nongshong shnong ba don ka jingkitkhlieh”, u la ong.