Kiew biang ka jingdon ki nongpang COVID-19 hapoh ka Jylla

Shillong, Naitung 1: Ka Meghalaya ha ka sngi Balang ka la ioh bïang sa arngut ki briew kiba ioh ïa u COVID-19 kaba pynlong ïa ka jylla ban kiew mynta sha ka 12 ngut ki ba ioh ïa utei u virus.

Haba kren bad ki lad pathai khubor, u Myntri ka Koit ka Khïah, Bah AL Hek u la ïathuh ba kitei ki arngut kiba ioh thymmai ïa utei u virus ki dei bïang ki shipai BSF. Kumta, kumba long mynta ka jingdon ki shipai BSF kiba ioh ïa utei u khñïang ka la kiew mynta sha ka 5 ngut.

“Baroh arngut kiba ioh ïa utei u virus kidei kiba ba ïabit na u driver BSF,” ong u Director ka tnad ka Koit ka Khïah, Dr. Aman War.

Na ka lïang u Myntri, u la ïathuh ruh ba ïa ka jaka sah jong ki BSF mynta kadei kaba don la ka jong bad kumta ym donkam satïa ban khot ïa ka kum ka containment area.

“Tang kato ka jaka sah wai kaba uwei na ki BSF u ioh ïa utei u COVID, la pynbna ba kan dei ka containment area,” u la ong.

Shwa kane, u Bah Hek u la ïathuh ruh ba ki don haduh 19646 tylli ki sample ba ki phah bad napdeng kitei, 19404 ki long negative bad kaba ki ap pat mynta ka long sa 189 tylli.

Kumba long mynta, ka jylla ka don 42 ngut kiba la koit na ki 55 ngut kiba ioh ïa utei u jingpang kynthup uwei uba la khlad noh.

La pyntip ruh ba ka jingdon ki nongshong shnong ka jylla kiba wanphai na shabar haduh mynta ka long 19231 ngut.

Haba bynrap lang, u Symbud Myntri Rangbah ka jylla,. Bah Prestone Tynsong u la ong ba ïa mynta hi kim pat donkam satïa ban test paidbah hynrei ki long pat kiba kloi lada ki ioh jingtip ba ka donkam ban leh kumta.

Na ka lïang ka sorkar jylla ka la rai ruh ban leh da kaba tyngeh ïa kito baroh ki pynkheiñ ain lane kiba leh pyhrshah ïa ki kyndon ba la pynjari da ka sorkar na ka bynta ban khanglad ïa ka jingphrïang jong u COVID.

“Ka sorkar ka la aibor ha ki Deputy Commissioner bad ki SP ha baroh ki distrik jong ka jylla ban pyntreikam ïa kitei ki kyndon bad ruh ban pynbna paidbah na ka bynta ka jingtip jong ki paidbah,” la bynrap bïang u Symbud Mynri Rangbah.

Katkum ka jingong jong u, ki kyndon jong u COVID-19 ka kynthup ïa ka jingieng jngai para briew bad kynthup ruh ïa ka jingdeng ïa ki jingda durkhmat ha ki jaka paidbah.