Kiew ka jingdon ki nongpang Covid, 53 mynta ka sngi

Shillong, Nailar 10: Ka Meghalaya ha ka sngi Nyngkong ka la don haduh 53 ngut ki briew kiba dang ioh thymmai ia u khniang jingpang Coronavirus kaba pynlong ia ka jylla mynta ban don haduh 611 ngut ki briew kiba don ia utei u virus.

Katkum ka jingiathuh da u Dr. Aman War Director of Health Services, la ong ba na kitei ki 53 ngut, 12 ngut ki dei na East Khasi Hills, kata ba kynthup 11 ngut na ki paidbah bad iwei na ki shipai. Katba ka West Garo Hills pat kadei kaba ioh bun eh da ki 39 ngut, kata 29 ngut ki  shipai BSF bad 10 ngut ki dei ki riew paidbah.

La iathuh ruh ba ha kane ka sngi ki la don haduh 8 ngut kiba koit kiba kynthup ia lai ngut na East Khasi Hills bad san ngut na West Garo Hills kaba pynlong ia ka jylla mynta ban don haduh 498 ngut kiba koit

Tad haduh kane ka sngi Nyngkong ka tnad ka la dep ban phah haduh 41734 tylli ki sample ha kaba 39785 tylli ki long negative bad kiba dang ap ia ka report pat ki long 834 tylli.

Shuh shuh la iathuh ba tad haduh kane ka sngi, na ki 611 ngut kiba ioh ia utei u virus, ka East Khasi Hills kadei kaba bun eh namar ka don haduh 428 ngut, kata 91 ngut na BSF, 268 ngut ki paidbah bad 69 ngut na ki shipai.. Nangta ka West Khasi Hills ka don 06 ngut, Ri-Bhoi 85, West Jaintia Hills 15, East Jaintia Hills 06, West Garo Hills 65, South West Garo Hills, South Garo Hills bad North Garo Hills ki don mar arngut.

 U Director of Health Services u la iathuh ruh ba na ki 11 ngut ki riew paidbah kiba ioh ia utei u virus mynta ka sngi, iwei dei i nongap nongpang ha Civil Hospital Shillong, iwei pat ba ap pang ha  North Eastern Indira Gandhi Regional Institute of Health and Medical Sciences (NEIGRIHMS), arngut ki nongtrei ka NEIGRIHMS, uwei u nongniah kali, sawngut kiba dang wan phai na bar jylla bad arngut pat kiba ia bit na uwei uba ioh positive.

Ha Ri Bhoi District pat, iba ioh ia utei u virus die iba leit ha ka Obstetrics and Gynaecology department ha Civil Hospital Nongpoh, katba ha  West Garo Hills pat na ki 10 ngut ki riew paidbah khyndai ngut dei kiba dang wan phai na bar jylla bad iwei pat iba ia bit na iwei iba ioh positive ha North Garo Hills.