Kiew ka jingïoh Covid-19 ki riew paidbah hapoh ka Jylla

Shillong, Naitung 22: Ka jingdon ki riew kiba ioh positive na u khñiang Coronavirus ka la nang kiew biang ha ka jylla namar tang ha kane ka sngi Balang ki la don haduh 25 ngut ki briew kiba dang ioh thymmai.

Da kitei ki 25 ngut ka Meghalaya ka don mynta haduh 433 ngut ki briew kiba don ia Utei u virus.

Kitei ki 25 ngut ki kynthup ia ki 19 na East Khasi Hills kiba kynthup ia 2 ngut shipai Asaam Rifles, 6 ngut ki BSF bad 11gut ki riew paidbah. Kiwei pat ki kynthup ia 4 ha West Jaintia bad 2 ngut na East Jaintia.

Ia kiba ha East Jaintia la lap sa kaba test paidbah ha iew Khliehriat. Na ka liang u DHS, Dr. Aman War u la ong ba mynta ka jingwad ia ki High Risk ka dang wad. Ha West Jaintia la iathuh ba iwei dei ba wanphai na shabar bad 3ngut pat kidei kiba lap ba kaba test paidbah ha iew Amlarem.

U DHS u la iathuh ruh ba mynta ka jingbuddien ia kito kiba kynduh ia kitei kiba ioh Positive ka dang bteng bad na ka liang ka tnad ka Koit ka Khiah ka pynkhreh ban leit test naphang kynthup ha ki jaka khappud bad ka Bangladesh.

Kumba long mynta ka East Khasi Hills kadei ka Distrik kaba bun eh ki nongpang COVID namar ki la don haduh 366 ngut bad na kine tang ki BSF ki la don 269 ngut katba kiwei pat ki poi 83 ngut nalor ki 14ngut ki shipai.

Ha kiwei pat ki Distrik, ka Ri Bhoi ka don mynta 42ngut, East Jaintia 3, West Jaintia 5, West Garo Hills 12ngut, South West Garo Hills 1, South Garo Hills 2 ngut, East Garo hills 1 bad North Garo Hills ruh 1.

Kiba koit pat haduh mynta ki long baroh 78 ngut kata kynthup ia ki 8 ngut kiba koit mynta ka sngi.