Kiew ka jingioh pang Covid ha Jhalupara, Rilbong bad Upper Mawprem

Shillong, Nailar 18: Ki la don haduh 21 ngut ki paidbah kiba paw ba ki ioh ia u khniang Coronavirus hynne ka sngi na ka random testing ba ka tnad ka koit ka khiah ka pynlong ha ki lai tylli ki jaka, kata ha Jhalupara, Rilbong bad ha Upper Mawprem

Haba kren bad ki lad pathai khubor, u Director ka tnad ka Koit ka Khiah, Dr. Aman Warr u la iathuh ba tang ha Jhalupara ki la don haduh 14 ngut kiba long positive, nangta ha 3 ngut ha Upper Mawprem bad 4 ngut pat ha Rilbong.

U Dr.Aman u la iathuh ruh ba haduh mynta ka random testing ka dang iaid shaid shaid ha kitei ki jaka. “Ha Rilbong ki la don sa kumba 200 ngut ei ei ki paidbah kiba hap ban leh ia ka random testing,” ong u Dr. Aman da kaba iathuh ruh ba tang na Rilbong haduh mynta ki la don haduh 44 ngut kiba la ioh positive, kynthup ia kitei ki 4 ngut kiba ioh hynne ka sngi.

Ha kane ka sngi, u DHS u la iathuh ruh  ba ki don haduh 39 ngut kiba ioh thymmai ia u COVID-19 kata khlem pat kynthup ia kito kiba ioh na ka random testing ha Jhalupara bad Upper Mawprem kiba long 17 ngut.

Kitei kiba ioh thymmai ki kynthup ia ki 27 ngut na East Khasi Hills ba kynthup ia ki 11ngut ki BSF, 7 ngut ki shipai bad 9 ngut ki paidbah. Ha Ri Bhoi pat ki don 3 ngut, East Jaintia – 1, South West Garo Hills -1, West Garo Hills – 7 ngut bad na kine 2 ki dei ki BSF bad 5 ngut ki dei ki paidbah.

La iathuh ruh ba haduh mynta ki don haduh 766 ngut ki briew kiba don ia utei u khniang jingpang. Na kine tang ha East Khasi Hills ki long 466 ngut, BSF – 80, Ki paidbah – 289 bad shipai – 77 ngut. Ha West Khasi Hills – 3, South West Khasi Hills – 1, Ri Bhoi – 103, West Jiantia – 4, East Jaintia – 6, West Garo Hills -189, South West Garo Hills – 5, South Garo Hills – 2 bad North Garo Hills – 8.

Kiba koit pat mynta ka sngi pat ki long 6 ngut, kata 4 ngut ha East Khasi Hills bad 2 ngut pat ha West Garo Hills. Baroh kiba koit haduh mynta ki long 685 ngut.