Kiew ki briew ba ïoh Covid: Pynbna ka sorkar da ka jingkhang dam ba 3 sngi ha nongbah Shillong

  • Shillongmail
  • July 24, 2020
  • Comments Off on Kiew ki briew ba ïoh Covid: Pynbna ka sorkar da ka jingkhang dam ba 3 sngi ha nongbah Shillong

Shillong, Naitung 24: Ka sorkar jylla ha ka sngi Thohdieng ka la pynjari da ka “Lock down” kaba 3 sngi kaban sdang naduh ka miet sngi u Blei ka 26 tarik mynta u bnai haduh ka 29 tarik hadien ba ka la don ka jingnangkiew ki briew kiba ioh ia u COVID -19.

Haba pynbna ia kane, u Symbud Myntri Rangbah ka jylla, Bah Prestone Tynsong u la ong ba katei ka sienjam ba ki shim ka long ban dup lah teh lakam ia ka jingkiew ki ba ioh COVID  kaba kiew man la ka sngi ha ka jylla.

“Ngim banse shuh ban wanrah biang da ka Total Lockdown ne ka jingkhang dam biang ia ka nongbah Shillong baroh kawei. Kane ka jingkhang dam kan sdang naduh ka shiteng miet jong ka 26tarik bad kan kut haduh ka 29 tarik shiteng miet mynta u bnai,” u la ong.

Nalorkata, u Bah Prestone u la bynrap biang ba ki khmih lynti ba katei ka sienjam ba ki shim  ka long ban iada bad khang lad ia ka jingnang phriang jong une u virus ha ki bynta jong ka nongbah Shillong.

Ha kajuh ka por u kyntu ruh ia ki paidbah ba kin shimlang ka jingkitkhlieh ba ha kine ki sngi ba don ka Lockdown kidei ban kiar na kaba mih shane shatai khnang ba ka jingiakhun ia utei u virus kan long kaba seisoh.

Ha kane ka sngi ka sorkar jylla ka la pynbna ruh ia ka kyrteng jong ki shnong kiba la pynngat kum ki jaka ba hap set kut shwa lane kita ki containment zone. Kitei ki shnong ki kynthup ia ka Mawbah – Barapathar, Jhalupara bad Upper Mawprem, Nongrah, Mawlai Umshing, Nongrim Hills, Lachumiere, Laitumkhrah- Nazareth bad Mawlai Umjaiur, Golf link Khliehshnong.

Shwa kane u Myntri ka Koit ka Khiah u la pyntip ba ki don haduh 53 ngut kiba ioh ia u COVID mynta ka sngi kynthup ia iwei i longkmie na Mawbah iba la khlad noh ha ka miet sngi Palei.