Kut ka jingsynshar ka PDF ha KHADC, thaw thymmai da ka PDA

Shillong, Lber 16: Kum ka dak ban wanrah ka jingïatrei lang hapdeng ka Khasi Hill Autonomous District Council (KHADC) ryngkat ka sorkar Meghalaya Democratic Alliance (MDA) ba lam khmat da ka NPP, ka Executive Committee jong ka KHADC ha ka jingïalam ka Peoples Democratic Front (PDF) hynne ka janmiet ka la pyntip paidbah ba la pyndam noh ïa ka Peoples Democratic Forum (PDF) bad la pynkylla kyrteng sha People’s Democratic Alliance (PDA).

Ïa kane la pyntip ha ka jingialang kaba long hynne ka janmiet ha kaba u Bah Pynshngain N Syiem, CEM ka KHADC u la ong, “Ngi la rai ban pyndam noh ia ka Forum bad tip noh mynta da ka PDA ha kaba ki dkhot ka liang synshar ki don 11 ngut na ka People’s Democratic Front (PDF), 4 ngut na ka National People’s Party (NPP), u wei na ka BJP, u wei na ka UDP, bad u wei u MDC khlem seng “, la ong u Bah Pynshngaiñ N Syiem.

“Ka jingdon ki dkhot sha ka liang jong ngi ka long 18 ngut bad kane ka jingpynkylla kyrteng ka long ban wanrah ka jing-iajan bad ka sorkar MDA kaba synshar ha ka jylla Meghalaya”, la ong u Bah Pynshngain uba la ong ba ha ka Dorbar mang tyngka ka KHADC yn wanrah beit ia ka mang tyngka kaba pura ym shuh da ka Vote on Account.

Ha ka jingshisha ia ka Dorbar mang tyngka ka KHADC la buh ba kan long ha ka 20 tarik mynta u bnai hynrei na ka liang u Bah Pynshngain N Syiem u la ong ba da ka jingsngewthuh jingmut na ka liang ka Executive Committee kan lah lehse ban phah jingthoh sha u Chairman ban pynkynriah ia ka Dorbar mang tyngka sha ka 27 tarik u Lber.

Halor ka jingkylli ba kiwei pat ki seng sain pyrthei na ka UDP bad HSPDP kiba ia trei lang ha ka MDA kim don lang ha ka PDA, u Bah Pynshngain u la ong ba ha KHADC ka shong eh ha ka mon ba laitluid uno uno u dkhot bad kam don jingteh bad kam don kaTenth Schedule ka ban teh ia ki. Kane ka jingkylli ka la mih namar 3 ngut ki dkhot ka UDP kim shym la poi ha kane ka jingialang watla u la don tang u dkhot na ka Mairang u Bah E. Nongrang.