Kwah ka sorkar MDA ban wanrah da ka mang tyngka ba pura ha Ïing Dorbar Thaw-aiñ

Shillong, Lber 12: U Myntri Rangbah ka Jylla Meghalaya u Conrad K Sangma hynne ka sngi u la pynpaw ba ka sorkar Meghalaya Democratic Alliance (MDA) ka kham kwah ban wanrah da ka mang tyngka ba pura ha ka Dorbar mang tyngka jong ka Ing Dorbar Thaw-ain ka jylla Meghalaya ia kaba shen yn sa pynlong.

“Ngi kwah ka mang tyngka kaba pura khnang ba yn ioh ban sdang ia ki kam bad ban iaid shaid shaid sha khmat “, la ong u Conrad K Sangma hadien ka jingialang ka kynhun myntri kaba la la ia mir jingmut na ka bynta ka jingai jingkren u Lat ka jylla.

Da kaba ong ba ka mang tyngka la pynkhreh na ka bynta ka jingtrei kam baroh shi snem, u la ong ba ka jingialang ka kynhun myntri kan rai la kan pyntrei kam da ka Vote on Account kaba lai bnai lane mang tyngka ba pura. “Ngi dang ia mir jingmut ha ka jingialang ka kynhun myntri halor kane ka phang”, la ong u Conrad.

Hynrei u Myntri Rangbah u la pynpaw ruh ba ka jingthmu ba kongsan eh ha jong ka jingialang ka kynhun myntri ka long ban ia mir jingmut halor ka jingai jingkren jong u Lat.

“Kan long da kaba bniah halor ka jingkren u Lat. Halor kine ki jingiamir jingmut na ka bynta ka jingai jingkren u Lat (kaba long kyrpang bha bad kaba ym donkam ban tip mano mano ruh) ka long kaba donkam bha bad yn sa phah sha u Lat ba un ai ka jing-mynjur “, u la ong.

Haba kylli, u Conrad u la ong ia ki sngi ban pynlong ia ka Dorbar mang tyngka yn sa shim rai da ka Business Advisory Committee (BAC). “Ka jingiakren ka la ïaid sha khmat bad kan sa long shen hynrei ka tarik ym pat buh bad ngam pat lah ban iathuh paidbah ha khmat jong phi”, la ong u Conrad.

Da kaba pynpaw ruh ba ka dei ka sorkar ka ban tyrwa ia ki sngi pynlong Dorbar mang tyngka, u Conrad u la ong ba ka sorkar kan pynthikna ba ka por kaba biang yn ailad na ka bynta ki kam jong ka sorkar bad ki kam jong ki shimet.