Kwah ki paidbah ka thaiñ khappud Ri War ban pynkloi ïa ka jingker khappud

Shillong, Ïaïong 12 : “Kumba long hi ki paidbah ha ki khappud ka Raid Lyngkhat ki kwah ban pynkloi ia ka jingker khappud bad pdiang ruh ba yn ker khappud 140 metre na u mawpud”, la ong u Bah KK Tangsong, Sordar ka Raid Lyngkhat haba ia kren bad ki nongthoh khubor.

“Ki paidbah kiba don jaka ha khappud ki la ioh pdiang ia ka bai lutksan kaba long 80 na ka 100 katkum ka kyndon sorkar bad ka ba siew bai lutksan ka long na ka bynta 11 metre”, la ong u Bah Tangsong uba la pynpaw ruh ba ki bor ba dei peit ki la kubur ban thaw ia ki khyrdop na ka bynta ki nongleit rep ban rung ban mih ha ki jaka kiba hapoh ka 140 metre.

“Ka jingeh ha kaba ia dei bad ka jingwan rung tuh ka dei ba ym don jingker bad ngi pynpaw ka jingangnud ban pynkloi ban ker khappud katba lah”, la ong u Sordar uba la pynpaw ba katkum ka Land Acquisition Act ka bai lutksan sha ki trai bri ne jaka la dep ba siew haduh 80%.

“Ka jingwan tuh ia ki mar rep mar riang ruh kan duna bad kan iarap ruh ia ki shipai iada khappud ban lah ban teh lakam ia ki jingeh kiba mih ha ki jaka khappud”, u la ong shuh shuh.

Na ka liang ki ophisar naka tnad External Affairs ki la wan jurip ia ki jaka bad la dep ruh ban ia kren pynbeit bad ki trai jaka. “Ngim don jingpyrshah eiei bad ha ka jingshisha la dei ban pynkloi noh ia kane ka kam”, la ong u Bah Tangsong.

Kum ban shu kdew ba ia kane ka mat ker khappud ka la mih ka jingpyrshah kaba jur na ka Co-ordination Committee on International Border (CCIB) kaba la dawa ban ker khappud naduh u mawpud ne Zero Line ha ki jaka khappud ka Ri War bad War Jaiñtia.