Kyntu ka RDA ïa u MR ban eksamin halor ka mat wanrah lynti rel

‘Ka jingïakren kadei ruh halor ki kam khappud & ban pynrung ktien Khasi bad Garo ha ka khyrnit ba phra’

Shillong, Nailar 24: Ka Regional Democratic Alliance (RDA) kaba long ka kynhun jong ka seng saiñpyrthei United Democratic Party (UDP) bad ka Hills State People’s Democratic Party (HSPDP) ha Iing Dorbar Thawain ka Jylla ha ka Sngi Nyngkong ka la kyntu ïa u Myntri Rangbah ka Jylla, Conrad K Sangma ban eksamin bha ha kaba ïa dei bad ka mat ban wanrah lynti rel sha ka Jylla.

Ïa kane ka mat, ka ka RDA ka la ïa kren bad u Myntri Rangbah ka Jylla haba leit pynsngew ïa ki ishu ba ki paidbah nongshong shnong ka jylla ki ïakynduh mawsiang -ka jingkyntur pud jong ka Jylla Assam sha u pud u sam jong ka Jylla Meghalaya, ka jingwanrah ïa ka lynti Rel bad ka jingïakhun ban pynrung ïa ka ktien Khasi ha ka Khyrnit kaba Phra jong ka Riti Synshar ka Ri India.

Haba kren ha ki nongthoh khubor hadien ka jinwan ïa kren bad u Myntri Rangbah, u Bah Bindo M Lanong, u la ong ba ka RDA kala kren shai ba ka Sorkar ka dei ban ïaid suki namar hap ban sngap ruh ïa ka sur jong u paidbah halor ka mat ïa kren wanrah lynti rel.

“Hynrei ha kaba ïa dei bad ka lynti rel na ka bynta ki rel ban kit mar kit mata, ka RDA ka la kyntu ïa ka sorkar ba kan peit bniah lada ka long ne em ban long noh tang ha Khanapara lane Byrnihat”, la ong u Bah Lanong..
“Lada don rel ban kit tang ïa ki mar ki mata ha Khanapara lane Byrnihat kan ïarap ha kaba pynhiar dor ïa ka bai kit bad haba hiar dor la sngewthuh kan don ka jingduna ha ki dor ki mur bad haba kiew ka bai kit kan don ruh ka jingkiewdor”m u la ong.

“Ngi la ai jingmut ban peit bniah ïa kane ka bynta haba ïa dei bad ki rel ban kit mar kit mata tang ha Khanapara lane Byrnihat”, u la ong.

Ha kawei pat ka liang, ha kaba ïa dei bad ka jingangnud ban pynrung ïa ka ktien Khasi bad Garo ha ka Khyrnit ba Phra jong ka Riti Synshar jong ka Ri India (ïa kaba la mynjur da ka Iing Dorbar Thawain ka Jylla bad phah sha ka Sorkar Pdeng ban ïoh jingmynjur), u Bah Lanong u la ong ba u Myntri Rangbah u la pynsngew ba ka Sorkar ka la shim khia ïa kane bad na ka liang jong u ruh kun sa bud dien bad shim khia.

Halor ka mat ban weng jingeh ha ki jaka khappud, Ka RDA ka la kyntu ïa u Myntri Rangbah ka Jylla ba dei ban don noh ïa ka jingïakren ha pdeng kine kine ar tylli ki Jylla ban wad ïa ka lad la kynti kumno ban ïa pynbeit ïa ka jingïa kajia pud hapdeng kine ki Jylla da ka jingïasngewthuh bad ïa burom mar kylliang.

U Bah Lanong u la ong ba ha u snem 1987 ka la don ka committee kaba la khlieh da u Justice Y.V. Chandrachud ha kaba la kdew ha kane ka kaiphod ba ka jylla Meghalaya ka kwah katkum ki Hima Khasi bad ka jylla Assam ka kwah ban pynbeit katkum ka Riti Synshar jong ka North East Re-organisation Act 1971.