Kyntu u MLA ka Sohra ban buh noh ïa ka subject Science bad Commerce ha Sohra Govt College

  • Shillongmail
  • May 20, 2020
  • Comments Off on Kyntu u MLA ka Sohra ban buh noh ïa ka subject Science bad Commerce ha Sohra Govt College

Shillong, Jymmang 20: U MLA ka People’s Democratic Front (PDF) na Sohra Constituency, u Bah Gavin M Mylliem, haba kren ha ka ha ka jingiatai kyllum (general discussion) jong ka dorbar mang tyngka ba bteng ka Ïng Dorbar Thawaiñ ka Jylla Meghalaya ha ka sngi balang, u la kyntu ia ka Sorkar Jylla ban buh noh ia ki bynta jingpule ia ka subject Science bad Commerce ha Sohra Government College.

“Ban ïoh khynnah pule ha ka subject Science bad Commerce kam long kaba eh namar ngi la don ki skul kiba paw kum ka Ramakrishna Mission Higher Secondary School bad St John Boys Higher Secondary School na ka bynta ki subject Science bad Commerce. Kane kan long ka jingmyntoi na ka bynta ki samla pule kiba wan khamtam eh na ki longing kiba duna ka ïoh ka kot”, u la ong.

Nalor kane, u la kyntu ia ka Sorkar Jylla ban phai khmat na ka bynta ka jingpynheh bad pynbha ia ka surok Umtyngngar-Sohra da kaba ong ba ka jingpynbha ia kane ka surok ka la long naduh u snem 2012 lyngba ka Special Plan Assistance. U la ong ba u sngew kmen ba ka Sorkar ka la shim khia ha kaba ia dei bad ka surok Umtyngar-Sohra-Laittyra-Mawlong-Ichamati-Bholaganj kaba don ia ka lynter kaba 76.50 km ban pynhap ha ka thup State Highway bad Major District Road bad pynhap kum ka National Highway.

Haba kren halor ka bynta kam jngohkai pyrthei, u la ong ba ka long ka nuksa kum kata karkhana kaba ym don jingktah ia ka Mariang. ” Ka jingtuid ki nonwan jngohkai pyrthei la sakhi ba ka la kiew bha ha ki snem ba la dep. Kane ka dei ka wei ka bynta kaba shah ktah eh na ka jingkhang khyrdep na ka bynta ka thma pyrshah ia ka jingpang COVID-19″, u la ong.

U la ong ba u ai ka jingïaroh ia ka sienjam ka Sorkar ban thaw ia ka Executive Committee jong ka Chief Ministers Economic Task Force COVID-19 bad ong, “Nga kyrpad ia ka Task Force ban pyndep da kaba shim khia ban pyndep ia ka kam khnang ba ki jingai jingmut jong ka yn lah ban ai kaiphod bad pyntreikam kam kloi katba lah”.

U la ai jingmut ban thaw lad thaw lynti ban pynkhlaiñ pynneh ia ki jaka jngohkai pyrthei bad kyntiew ia ka ïoh ka kot ki nongshong shnong ka thaiñ kiba im ja da kane ka kam.

Une u MLA u la kdew ba ka Jylla Meghalaya ka shaniah ia ki jingïarap na ka Sorkar Pdeng, ha kaba ia dei bad ka mang pynioh tyngka, kumta ka Jylla ka shah ktah na ka daw ka jingkhang khyrdep ban iada ia ka jingpang COVID-19.

U la bynrap da kaba iaroh ia ka jingthmu ka Sorkar ban phai khmat sha ki mar poh khyndew kiba dei na ka Jylla kum shi bynta ban kyntiew ia ka jingioh khajna. Une u MLA u la ai khublei ia baroh ki nongtrei kiba ha khmat eh kiba ia khun pyrshah ia ka jinglah ban saphriang ka jingpang COVID-19 bad bynrap ruh ba ka Sorkar ka la pynlut bun ha ka tnad ka Koit ka Khiah.

U Bah Gavin M Mylliem u la iathuh ba ha ka jingleit jurip jong u ia ki PHC bapher bapher u la lap ba bun ki Isolation Ward kim da biang katkum ka jingkhmih lynti kumba la pruid kyndon da ka tnad ka Koit ka Khiah ban iakhun ia ka COVID-19.

“Kane ka long kum ka jinghikai ia ka Sorkar bad ia ki Sorkar ban wan khnang ba ha kaba ia dei bad ki kam tei jingtei (construction) na ka bynta ki PHC, ki CHC bad ki Sub-Centre dei ban don ki kyndon na ka bynta ki jingtei baroh khnang ba lah ban pynbiang katkum ka jingdonkam khamtam bad ki bynta kiba eh kiba lah ban ia kynduh na ka por sha ka por”, u la ong.

Shuh shuh, u la ong ba bun na ki Community and Rural Development Block ki duba bha ia ki jingdonkam ba ha khmat eh. “Ka jingeh ka long ba kane ka ophis treikam ka shim jingkitkhlieh ban pynpoi ia ka bhah pisa ba la mang na ka bynta ki kam pynroi ha ki jaka nongkyndong hynrei ka jingshisha ka long ba kim ioh pisa ban pynbit pynbiang ia ki ophis pat”, u la ban shuh shuh.