Lada ïatylli ki nongrep, ka ïoh ka kot kan kiew shaphrang: Banteidor

Shillong, Naitung 09: U Bah Banteidor Lyngdoh, MLA ka Mawkynrew Constituency uba dei ruh u Myntri Sorkar Jylla ba dei peit ia ka tnad Agriculture u la kyntu ia ki nongrep ka thain Mawkynrew ban long kiba ia tylli khnang ba ka ïoh ka kot kan kiew shaphrang.

Ia kane u Myntri u la pynpaw haba kren ha ka jingialam sam symbai mar rep ha ka sngi palei ha Shnong Jongksha sha ki nongrep na ki shnong bapher bapher ka Constituency kum shi bynta ban iarap ia ki ban sdang thung da kiwei pat ki jait jingthung ne jingrep.

“Kine ki symbai mar rep kum u kajor dhonia, phresbin, u rymbai kin long ka jingmyntoi ia phi ki nongrep nalor ki jait jingrep kiba phi shait rep kum u kubi bad u phan. Ngi hap ban shaniah ha kiwei pat ki jait mar rep khnang ban kyntiew ia ka ïoh ka kot”, u la ong.

U Myntri u la iathuh ruh ba ka don ka jingangnud ban pynurlong ia ka Horticulture Hub bad Fruit Processing Centre ha ka thaiñ Mawkynrew. U la ong ba u kwah ban ïohi ba ka Mawkynrew C&RD Block kan long kaba kiew sha khmat ym tang ha ka rep ka riang hynrei ha ki kam kumjuh ha ka liang ka roi ka par.

“Kumta ban pynurlong ia kane ngi donkam ka jingïatreilang bad jingiatylli. Kumba ka Constituency hi kaba bun ki nongshong shnong kiba dang shaniah ha ka rep ka riang, ki don ki jaka ha ka Constituency ki kham biang ban rep soh rep pai bad ki don pat ki jaka kiba paka ban rep da ki mar rep kum ki jhur”, u la ong.

Ha kane ka sngi la ïoh ruh ka jingiaphylliew jingmut na ka liang ki ophisar ba kynthup ia u Bah L Dkhar, District Horticulture Officer, i Kong S Kharpuri, District Agriculture Officer, kiba la ia mir jingmut kumno ban pyndonkam ia ki symbai bad ruh ban ai ka jingïatreilang na ka liang ki nongrep da kaba ai ia ki kyrteng bad phone number jong ki nongioh myntoi.

Kiwei pat kiba la ia donlang ki kynthup ia u Sordar ka Shnong Jongksha, u Bah Olet Kharsahnoh uba la pyniaid ia ka jingialang, u Bah Seibor Warbah, Spokesperson ka PDF Mawkynrew Constituency lem ki nongkitkam jong ka, ki Rangbah Shnong na ki shnong bad thaiñ ba marjan, ki nongrep bad kiwei kiwei.