Lada lap bym don jingmyntoi, lah ban weng noh ka UDP ïa ka jingïatehlok bad ka HSPDP & GNC

  • Shillongmail
  • March 25, 2018
  • Comments Off on Lada lap bym don jingmyntoi, lah ban weng noh ka UDP ïa ka jingïatehlok bad ka HSPDP & GNC

Shillong, Lber 25: Ka United Democratic Party (UDP) ka la pyntip ba ka ladep ban thaw da ka Core Committee (CC) na ka bynta ban bishar bniah bad ban tip ba haduh katno, kata ka jingïatehlok para seng riewlum ka la ïarap lane ka la ktah ïa ka seng ha ka ilekshon kaba dang shu dep ban long.

Ka seng UDP kadei kaba la ïatehlok ban ïakhun ïa ka ilekshon MLA 2018 haryngkat ka jingïatreilang bad ka Hill State People’s Democratic Party ( HSPDP) ha Rilum Khasi- Jaiñtia bad ka Garo National Council ( GNC) ha Rilum Garo.

Ïa kane ka rai, ka UDP ka la shim ha ka jingïalang jong ka Central Executive Committee (CEC) kaba la long ha ïingsah u President ka seng uba dei ruh u Lamphang ka ïingdorbar Thawaiñ, u Dr Donkupar Roy Dkhar ha ka sngi Saitjaiñ.

Lah ban pynkynmaw, hashuwa ka ilekshon, ka UDP ryngkat bad ka HSPDP bad GNC ka la thaw ïa ka Regional Democratic Alliance (RDA) ha kaba ka UDP ka la pynïakhun kyrtong na 35 tylli ki konstitwensi, ka HSPDP na 13 tylli ki konstitwensi bad ka GNC na 6 tylli ki konstitwensi.

Na katei ka ilekshon, ka UDP ka la jop tang 6 tylli ki konstitwensi, HSPDP – 2 tylli bad ka GNC pat ka khlem lah satia ban jop wat tang kawei ka konstitwensi.

Ki MLA ka UDP bad HSPDP mynta ki ai jingkyrshan ïa ka Sorkar Meghalaya Democratic Alliance (MDA) kaba lamkhmat da ka NPP hapoh ka jingïalam u Conrad K. Sangma kum u Myntri Rangbah.

Ïa kane ka committee yn khlieh da u bah Paul Lyngdoh kum u chairman, ki MLA, bah Jemino Mawthoh, bah Bindo M Lanong bad bah Alantry F Dkhar kum ki dkhot.

Haba ïakren bad ki lad pathai khubor, u bah Paul u la ong, ka CC kan sa peit bniah haduh katno ka jingïatehlok shwa ka ilekshon ka la ïarap ne ktah ïa ka jingïakhun ïa ka ilekshon bad ïa kane yn sa bishar bniah bin pa bin ha baroh ki konstitwensi.

U la ong ba khlem pep ka jingïarap ka don ha ki katto katne ki konstitwensi lyngba kane ka jingïatehlok, bad lehse ka don ruh ka jingshahktah.

Haba kylli la ka RDA kan dang bteng ne kan kut noh, u Bah Paul u la ong ba hadien ba ka CC ka la dep ban bishar bniah, bad ai ïa ka kaiphod, yn sa don ka jingïakren la ka dang donkam ban bteng ne yn pynwai noh ïa ka jingïatehlok.

Ha kawei ka liang, ha kaba ïadei bad ka jingrem bun tylli ki konstitwensi, u bah Paul u la ong, ka jingrem jong ka ha ka ilekshon MLA kaba dang shu dep ka dei namar ka bor jong ka pisa.

U la kynnoh ruh ba ka Congress ha ka por ba dang don ha ka bor, u Myntri Rangbah barim u Dr Mukul Sangma u la pyllait ïa ka skhim shwa ka ilekshon ha kaba kaba la thied ïa ki paidbah da ka pisa.

Hynrei u la ong, ka seng ka ladep ban thaw da ka Election Committee na ka bynta ban pynkhlaiñ ban lah ban trei borbah nangne shakhmat ban pynkhlaiñ ïa ka seng, khamtam ban pynkhreh ïa ka ilekshon sha ïingdorbar District Council bad ka ilekshon sha ïingdorbar Lok Sabha.