Lah ban weng noh ia ka ophis u Shillong Times na ka thup Containment zone

Shillong, Nailar 25: U Director of Health Services, Dr. Aman Warr ha ka sngi Baar u la ong ba ka sorkar jylla ka lah ban weng noh ia ka BSF Umpling na ka thup containment zone h akano kano ka por la ka long mynta ne la shai ka sngi katkum ka jingibit na ka liang ka sorkar.

Haba kren ia kane bad ki lad pathai khubor, u DHS u la iathuh ruh ba na ka liang ki bor bahalor jong ki BSF ki la pyntip sha ka sorkar ba baroh ki nongpang COVID kiba don kumba 400 ngut ei ei na katei ka ktem ki la koit lut lait noh sa tang katto katne kiba dang don ha ka jingshah set slung.

Ha kawei pat ka liang u la ong mynta ki dang phah ia ka kaiphod halor katei ka bynta sha ka Deputy Commissioner jong ka District ban bishar bniah haba iadei bad ka bynta lano ban weng noh ia katei ka jaka na ka thup containment zone.

Na ka liang u DHS u la iathuh ruh ba baroh ki High Risk Contact na Shillong Times ki la paw ba ki khlem ioh ia u COVID hynrei la katta pat kito kiba don ha katei ka thup ki dang hap ban pyndep ia ka jingset slung.

Na ka liang u DHS u la iathuh ruh ba ki don 42ngut ki briew kiba ïoh ïa u khñiang jingpang Coronavirus ha kane ka sngi Balang kynthup ïa ki 31 ngut  tang na East Khasi Hills, 6 ngut na West Garo Hills, lai ngut na Ri Bhoi, iwei na West Jaintia bad North Garo Hills.

Haba phai sha East Khasi Hills, na kitei ki 31 ngut, 10 ngut dei ki shipai bad 21 ngut dei ki riew paidbah. Kumba long haduh mynta hi, ka jingdon ki briew kiba ioh ia utei u virus ka la poi sha ka 1178 ngut ha kaba ka East Khasi Hills marwei ka la don haduh 797 ngut, bud sa ka West Khasi Hills – 43, Ri Bhoi – 94, West Jaintia – 3, East Jaintia – 12, West Garo Hills – 197, South West Garo – 4, South Garo Hills – 12, East Garo Hills – 3 bad North Garo Hills – 13.

Tang kiba koit ha kane ka sngi ki don haduh 43 ngut, kata kynthup 3 ngut ha East Khasi Hills, 7 ngut ha Ri Bhoi, iwei ha South West bad 32 ngut ha West Garo Hills