Lap ka sorkar ba len ki briew kiba leh test Covid ïa ka kyrteng bad jaka sah

Shillong, Nailar 5: Ka sorkar jylla ha ka sngi Balang ka la pynpaw ka jingsngewkhia halor ka jingdon ki briew kiba leit test COVID kiba ai thok pat ia ka kyrteng, la jaka sah kumjuh ki mobile number jong ki.

Haba pynpaw ia kane, u Symbud Myntri Rangbah ka Jylla, Bah Prestone Tynsong u la ong ba katei ka jingthok kitei ki briew ka jia ha ki jaka rung shapoh ka jylla. “Kane ka mut ba ki kwah ban buhrieh ia ka jaka sah bad ialade. Ngi lap ba ka number phone ba ki ai kam treikam satia haba ngi phah ia ka SMS sha ki ban pyntip shaphang ka test jong ki,” u la iathuh shuh shuh.

Da kaba pyntip ba ka sorkar jylla ka la shimkhia bha halor katei ka bynta, u Bah Prestone u la ong ruh ba ka sorkar kan wad ia kitei ki briew bad kan sa pynshitom ia ki katkum ka aim. Ha kajuh ka por u pynpaw ruh ka jinglyngoh ba kumno ki briew ki nud ban thok ialade ha kum kane ka por ba ka sorkar ryngkat ki paidbah ki iakhun pyrshah ia u COVID.

Ha kawei pat ka liang, u Symbud Myntri Rangbah u la pyntip ruh ba ka sorkar jylla ka la thung ia ka kynhun tohkit haba iadei bad ka jingjia ha Ganesh Das Hospital dang shen.

Ia katei ka jingtohkit yn khlieh da u Director of Health Services (MI), Dr. Aman Warr bad la ai por artaìew ban phah ia ka report.

U Bah Prestone u la iathuh ruh ba ia ki troknba wan kit jhur ne ki mar rep na kane ka jylla dei ban shim ba kidei ki kali ba kit ia ki mar ba donkam khnang ba kan ym don shuh ki jingjia shah pynsangeh ne shah khang ha kino ki kynhun.

Haba iadei pat bad ka jingiap ki sniang ha Lamin u la ong ba ka sorkar kam shym la khang satia ban bam dohsniang hynrei ka shu bthah ba ka jingpynìap bad la jingbam dohsniang ha Lamin bad ki shnong ba marjan dei ban sangeh shwa shipor katba pat ioh ka report.

La pyntip ruh ba ia mynta shipor la khang shwa wat ban pynpoi sniang na kawei ka jaka sha kawei pat.