Lap metïap ki pulit na ka surok Umsning bypass

Nongpoh, Lber 16: Ki bor pulit jong ka Ri Bhoi District, na Umsning Police Outpost ki la ioh ban tam noh ia kawei ka metiap kaba la thiah lyngktar hapdeng ka jinglyngkien jong ka snam, na Umsning Bypass kaba don ruh harud jong ka shnong Lum Umpih, Ri Bhoi District.
Katkum ka tyllong khubor na ki pulit, la ong, ba hynne ka step ha ka por 6.45 ki la ioh ia ka jingtip halor kane ka jingdon jong katei ka metiap bad mar mar ki la leit ban jurip, ha kaba ki la lap ba kane ka metiap ka dei jong u bar jylla, ha kaba ki la suba jur ruh ba u ne u briew u la shah pyniap ha kaba ki runar ki la lynthem da u maw na ka khlieh jong u ne u briew.
Ki bor pulit ki la iathuh ruh, ki la ioh ruh ban tam ia u wei u maw heh ba la bit snam bad la suba ba ki briew ki bym lah ban ithuh ki la shu lynthem beit da u maw na ka khlieh jong u tei u briew, hynrei ki pulit kim pat lah ban pyntikna la u tei u briew u la shah pyniap ha katei ka jaka ne la u shah pyniap sha kawei pat ka jaka bad la shu wan bret pat ha Umsning Bypass.
Na ka liang ki bor pulit ki dang pynlong ia ka jingtohkit kaba jur ban lap ia ka jingshisha bad ruh ban kem ia kito kiba la donkti ha kane ka kam, ia kane ka metiap la rah noh sha Nongpoh Civil Hospital na ka bynta ban leh pat ia ka post mortem.