Lashai ka ilekshon Lamphang ka ïingdorbar thawaiñ – u Dr. Don pyrshah ïa u Winnerson

  • Shillongmail
  • March 11, 2018
  • Comments Off on Lashai ka ilekshon Lamphang ka ïingdorbar thawaiñ – u Dr. Don pyrshah ïa u Winnerson

Shillong, Lber 11: Ka jingïatynjuh bor hapdeng ka liang synshar bad ka liang pyrshah kan long lashai ka sngi ha ka ïingdorbar thawaiñ jong ka jylla Meghalaya kaba dei ka ilekshon ban jied ïa u Lamphang ka ïingdorbar bad ïa kane yn pynlong da ka jingïathep vote ha Rilbong.
Ha kane ka ilekshon, ka sorkar Meghalaya Democratic Alliance (MDA) kaba lamkhmat da ka seng NPP ka pynieng da u MLA ka Shella uba na ka seng UDP Dr. Donkupar Roy kum u kyrtong katba ka seng Congress kaba don ha ka liang pyrshah ka pynïakhun da u Winnerson D Sangma.

Ka MDA ka don 36 ngut ki dkhot kaba kynthup ïa ka NPP (19), UDP (6), HSPDP (2), PDF (4), BJP (2), u MLA ba marwei na ka NCP (Saleng Sangma) bad arngut ki MLA shimet Samuel Sangma bad Lambor Malngiang ha ka ïing kaba 59.
Katba ka seng Congress ka don 20 ngut ki MLA na ki 21 tylli ki konstitwensi kaba kynthup ïa ka Ampati bad Songsak kaba mihkhmat da u myntri rangbah barim ka jylla, u Dr. Mukul Sangma.
Hynrei sa uwei u MLA shimet u bah Santar K Sunn haduh mynta um pat pynbna la un don sha kano ka liang tangba la shu bna ba un leit sha ka liang synshar kaba don mynta 36 ngut ki MLA.
Ka KHNAM kaba don uwei u MLA kata u bah Adelbert Nongrum ka la shim ïa ka rai kumba la ong da utei u nongmihkhmat ka ladep ban pynsngew ba kan don ha ka liang pyrshah ym pat ban pynïasoh bad ka Congress.
Haba ïadei bad ka jingjied ïa u speaker jong ka ïingdorbar thawaiñ ka jylla la shai ka sngi, u bah Adelbert u khlem pynsngew la ïano un kyrshan ha ka jingïathep vote ban jied Lamphang.
Kane ka ilekshon thep vote na ka bynta u Lamphang kan long ha ka por 10 baje mynstep katkum kaba la pynkhreh da ka ophis jong u Secretary ka Meghalaya Legislative Assembly.